Yevroparlament Haaga sudini Lukashenkoni hibsga olishga order berishga chaqirdi

Yevroparlament Haagadagi Xalqaro jinoiy sudni Belarus rahbari Aleksandr Lukashenkoni hibsga olishga order berishga chaqirdi. 13 sentabr, chorshanba kuni yevrodeputatlar tomonidan ma’qullangan rezolyutsiyada Lukashenko Ukrainaning Rossiya tomonidan egallab olingan viloyatlaridan 2150 dan ortiq bolalarni, shu jumladan yetimlarni Belarusdagi sog‘lomlashtirish lagerlariga majburan olib chiqishda sherik sifatida ko‘rsatilgan, ular u yerda «ruslashtirish va mafkuraviy bosimga duchor bo‘lmoqda». Yevropa parlamenti Lukashenko va uning rejimini Vladimir Putin va bolalar ombudsmeni Mariya Lvova-Belova singari ushbu harakatlar uchun javobgar deb biladi.

YeP Lukashenko rejimining Ukrainaga qarshi harakatlardagi ishtirokini qoraladi

Rezolyutsiyada Lukashenko rejimining Ukrainaga qarshi asossiz, noqonuniy tajovuzkor urushdagi ishtiroki; Rossiya qo‘shinlarini qurol-yarog‘ va harbiy texnika bilan ta’minlashi, armiya uchun butlovchi qismlarni ishlab chiqarishi, qo‘shinlarni mamlakatga joylashtirishi va ularni Belarus instruktorlari tomonidan o‘qitishi; Rossiya agressiyasiga qo‘shilishi hamda Ukraina chegarasi yaqinida qo‘shinlarni joylashtirishi qoralanadi.

Belarus rahbariyati maxsus tribunal oldida javob berishi kerak 

Hujjatda qayd etilishicha, Lukashenko rejimi sodir etilgan jinoyatlarga sherik bo‘ldi, bu Ukrainaga yetkazilgan vayronagarchilik va zarar uchun javobgarlikni nazarda tutadi. Shu munosabat bilan Yevroparlament Ukrainaga nisbatan sodir etilgan jinoyat bo‘yicha maxsus xalqaro tribunal nafaqat Rossiya, balki Belarus rahbariyati harakatlarini ham tekshirish yurisdiksiyasiga ega bo‘lishi kerak, deb hisoblaydi. 

Shu sababli, yevroparlamentariylar Yevropa Ittifoqi institutlari va Yevropa Ittifoqi davlatlarini «Ukrainaga qarshi bosqinchilik, harbiy jinoyatlarda ishtirok etgan Belarus rasmiylarini jinoiy javobgarlikka tortish»ni ta’minlash uchun barcha choralarni ko‘rishga chaqirdi.