O‘zbekistonda «ekologik markirovkalash» amaliyoti joriy etiladi

Prezidentning 2023 yil 11 sentabrdagi farmoni bilan tasdiqlangan “O‘zbekiston – 2030” strategiyasida energetika sohasiga oid ustuvor maqsadlar belgilandi.

Strategiyaning 51-maqsadida “Yashil iqtisodiyot”ga o‘tish, uning asosi bo‘lgan qayta tiklanuvchi energiyadan foydalanish ko‘rsatkichlarini keskin oshirish, qayta tiklanuvchi energiya manbalarini 25 ming MVt hamda jami iste’moldagi ulushini 40 foizga yetkazish, sanoatda “yashil sertifikat”lar bozorini rivojlantirish va “ekologik markirovkalash” amaliyotini joriy qilish o‘z aksini topdi.

3 GVt quvvatli 3 ta issiqlik elektr stansiyalarini modernizatsiya qilish orqali tabiiy gaz sarfini kamaytirish hamda ko‘p qavatli uy-joylardagi xonadonlarning energiya samaradorligi (energoaudit)ni baholash tizimini joriy etish hamda shaharlarda jamoat transportini ekologik toza yoqilg‘iga o‘tkazish maqsad qilindi.

Iqlim o‘zgarishi sohasida barcha issiqxona gazlarini qamrab oluvchi monitoring tizimini (MRV) yaratish, issiqxona gazlarining yalpi ichki mahsulot birligiga nisbatan 2010 yildagi darajadan 30 foizga qisqartirishni amalga oshirish belgilandi.