Osiyo O‘yinlari-2022 futbol dasturida chorakfinal bahslariga start berildi. O‘zbekiston olimpiya jamoasi Saudiya Arabistoniga qarshi saf tortdi.
Hangjoudagi stadionda o‘tgan o‘yinda Temur Kapadze shogirdlari bahsni hujumkor boshlab, 24-daqiqada Jasur Jaloliddinovning uzatmasidan keyin Mirazamat Mirsaidov chiroyli goli bilan hisobni ochdi – 1:0.
Birinchi bo‘lim yakunida esa darvozabon Vladimir Nazarovning uzatmasidan keyin Alisher Odilov raqib jamoa himoyachilari va darvozabonini ortda qoldirib, uzoq masofadan bo‘sh darvozani ishg‘ol etdi – 2:0.
Ikkinchi bo‘limni nisbatan xotirjamroq o‘tkazgan vakillarimiz 65-daqiqada himoyadagi bo‘sh o‘yin uchun jazolanishdi – 2:1.
Qolgan daqiqalarda g‘alabali hisobni saqlab qolgan olimpiyachilarimiz Saudiya to‘sig‘idan o‘tib, yarimfinalga yo‘llanma olgan dastlabki jamoaga aylanishdi. Kapadze shogirdlari yarimfinalda Xitoy – Janubiy Koreya uchrashuvi g‘olibiga qarshi o‘ynaydi. Bahs 4 oktyabrda o‘tkaziladi.
Eslatib o‘tamiz, kuni kecha O‘zbekiston ayollar futbol jamoasi ham Xitoy Taypeyini mag‘lub (2:1) etib, Shimoliy Koreyaga qarshi o‘tadigan yarimfinalga yo‘llanma olgandi.
Osiyo O‘yinlari-2022. Futbol. Chorakfinal
O‘zbekiston U23 – Saudiya Arabistoni U23 – 2:1
Gollar: Saidazamat Mirsaidov 24, Alisher Odilov 44 – Muhammad Marran 65.
O‘zbekiston: 12.Vladimir Nazarov, 2.Saidazamat Mirsaidov (Ruslanbek Jiyanov, 77), 5.Muhammadqodir Hamraliyev, 8.Behzod Shamsiyev (Mahmudjon Mahamadjonov, 67), 10.Jasur Jaloliddinov, 14.Ibrohimxalil Yo‘ldoshev, 16.Asadbek Rahimjonov, 17.Abdurauf Bo‘riyev, 18.Alibek Davronov, 19.Husayn Norchayev, 22.Alisher Odilov.
Zaxira: Hamidillo Abdunabiyev, Otabek Boymurodov, Shohjahon Sultonmurodov, Otabek Jo‘raqo‘ziyev, Sherzod Esanov, Eldorbek Begimov.
Saudiya Arabistoni: 21. Ahmad Fahad, 2. Muhammad Vohib Abu Ash-Shamat, 4. Rayyon Muhammad Hamid, 5. Muhammad Al-Ya’mi, 12. Zakariyo Havsavi, 8. Faysal Al-G‘amdi, 10. Saad Fahad Alhn-Nassr, 11. Ahmad Mazen Al-G‘amdi, 14. Avad Haydar, 18. Musab Aj-Juvayr, 16. Muhammad Marran.
