Britaniya yangi atom suvosti kemalarini qurish uchun 4,5 mlrd yevrolik shartnoma imzoladi

Buyuk Britaniya Mudofaa vazirligi AUKUS xavfsizlik alyansi doirasida suvosti kemalarini qurish uchun 4 milliard funt sterlinglik (4,6 milliard yevro) yangi shartnoma imzoladi. Bu haqda Britaniya mahkamasi rahbari Grant Shepps 1 oktyabr, yakshanba kuni hukmron Konservativ partiyaning Manchester shahrida bo‘lib o‘tgan qurultoyida ma’lum qildi. «Bugun men Buyuk Britaniyaning yetakchi kompaniyalari bilan Qirollik dengiz floti tarixidagi eng kuchli hujumkor suvosti kemalarini yaratishni jadallashtirish bo‘yicha shartnoma imzolaganimizni e’lon qilishim mumkin», dedi Shepps.

Buyuk Britaniyaning yirik korxonalari ilg‘or suvosti kemalarini ishlab chiqish va ishlab chiqarishda ishtirok etadi. Batafsil loyihalash bosqichida BAE Systems, Rolls-Royce va Babcock Marine bilan uzoq muddatli shartnomalar imzolanishi «Buyuk Britaniya uchun ham, umuman uch tomonlama AUKUS dasturi uchun ham kelajak yadroviy hujumkor suvosti kemalari sinfini rivojlantirish oldidan muhim bosqichdir», deyiladi Britaniya Mudofaa vazirligi saytida. 

Britaniyaning Astute sinfidagi suvosti kemalari o‘rnini bosuvchi birinchi SSN-AUKUS suvosti kemasi 2030-yillarning oxirida Britaniya Harbiy-dengiz kuchlariga taqdim etilishi kutilmoqda. Mudofaa vazirligi veb-saytidagi bayonotga ko‘ra, «bular Qirollik dengiz floti tomonidan boshqariladigan eng katta, eng zamonaviy va eng kuchli hujumkor suvosti kemalari bo‘ladi». 

AQSh va Avstraliya ishtirokidagi ittifoq 

AUKUS nomi 2021 yilda tuzilgan xavfsizlik ittifoqiga a’zo bo‘lgan uch mamlakat: Avstraliya, Buyuk Britaniya va AQSh davlatining birinchi harflaridan olingan. Ushbu hamkorlik turli xil turdagi qo‘shma harbiy ishlanmalardan tashqari, Avstraliya uchun yadroviy suvosti kemalarini qurishni ham o‘z ichiga oladi. Avstraliya 2040-yillar boshida AQSh va Britaniya texnologiyalaridan foydalangan holda o‘zining birinchi suvosti kemasi SSN-AUKUS’dan foydalanishni boshlashi kutilmoqda. 

Britaniya suvosti kemalari qurilishi asosan Britaniyaning Barrou-in- Fernessdagi kemasozlik zavodida amalga oshiriladi, Avstraliya esa yaqin o‘n yil ichida suvosti kemalari uchun o‘zining sanoat bazasini rivojlantirish va ularni o‘z hududida ishlab chiqarish ustida ish olib boradi, Rolls-Royce esa Britaniya va Avstraliya suvosti kemalari uchun yadroviy reaktorlar yetkazib beradi.