BMT sudi Armanistonning Ozarboyjonga qarshi da’vosi bo‘yicha ochiq majlis o‘tkazadi

Haagadagi Xalqaro sud Armanistonning Ozarboyjonga qarshi Qorabog‘dagi arman aholisiga nisbatan kamsitishning oldini olish bo‘yicha vaqtinchalik choralar ko‘rish talab qilingan da’vosi bo‘yicha ochiq eshituvlar o‘tkazishni belgiladi. 6 oktyabr, juma kuni muassasa matbuot xizmati xabariga ko‘ra, sud majlisi 12 oktyabr kuni bo‘lib o‘tadi.

Armanistonning da’vosi 29 sentabr kuni Xalqaro sudga taqdim etilgan. Unda Yerevan Bokudan barchaga Qorabog‘dan chiqib ketish imkoniyatini berishni, BMT va Qizil Xoch vakillarining mintaqadagi arman aholisi bilan muloqotini ta’minlashni va kommunal tizimni tiklashga yordam berishni talab qildi. Armaniston, shuningdek, Ozarboyjondan ilgari tan olinmagan va tugatilgan Qorabog‘ Respublikasi hukumati tomonidan berilgan fuqarolik holati dalolatnomalari to‘g‘risidagi guvohnomalarni haqiqiy deb tan olishini hamda Qorabog‘ning amaldagi yoki sobiq siyosiy vakillari yoki harbiy xizmatchilariga nisbatan jazo choralarini ko‘rmasligini so‘rayapti.

Bundan tashqari, arman tomoni Ozarboyjon harbiylari va xavfsizlik kuchlaridan Qorabog‘dagi tinch aholi punktlarini tark etishni talab qilib, mintaqadagi arman madaniy merosi obidalarini buzish taqiqlanishini talab qilmoqda. 

100 mingga yaqin arman Qorabog‘dan chiqib ketdi 

19 sentabr kuni, xalqaro huquqqa ko‘ra, hududida Qorabog‘ joylashgan Ozarboyjon mintaqada harbiy amaliyot boshladi. Oradan bir kun o‘tmay tan olinmagan Qorabog‘ Respublikasi rahbariyati qarshilikni to‘xtatayotganini e’lon qildi. Shu fonda Qorabog‘dan etnik armanlarning ommaviy chiqib ketishi boshlandi. Natijada Armanistonga 100 mingga yaqin qorabog‘lik qochqin kirib bordi.