Armanistonning Tarixiy muhit va tarixiy-madaniy muzey-qöriqxonalarni muhofaza qiliş xizmati 27-oktabr kuni Metsamordagi yangi arxeologik topilmalar haqida xabar berdi. Mutaxassislar «Metsamor» tarixiy-arxeologik muzey-qöriqxonasiga tutaş hududda qazişmalar olib bormoqda.
Topilgan buyumlar orasida oltin sirğalar, tugma, bronza xanjar va Oktavian Avgust bilan boğlanayotgan tanga bor. Xizmat ularning suratlarini ham eʼlon qilgan.
Fotosuratlarda halqasi tutaşmagan, börtma naqşlar bilan bezatilgan yirik oltin sirğalarni köriş mumkin. Suratlardan birida taqinçoq tadqiqotçining kaftida körsatilgan, boşqasida esa sirğalar topilmalarni saqlaş uçun möljallangan paketlarga joylangan.
Alohida suratda dumaloq tugma aks etgan. Qazişma joyida olingan yana bir kadrda tuproq orasida yotgan çözinçoq tiğ körinadi. Uning yonida sirtini yaşilsimon qatlam - patina qoplagan mayda buyumlar ham bor.
Tangada erkak kişining yon tomondan tuşirilgan tasviri va çetlari böylab yozuvni köriş mumkin. Xizmat xabarida uşbu tanga Rimning birinçi imperatori Oktavian Avgust bilan boğlangan.
Britaniya muzeyi maʼlumotlariga köra, Oktavian miloddan avvalgi 27 yilda Avgust nomini qabul qilgan va milodiy 14 yilda vafot etgan. Biroq Metsamordan topilgan tanganing nominali, qaysi zarbxonada tayyorlangani va aniq zarb qilingan yili hozirça maʼlum qilinmagan. Taqinçoqlar va xanjarning har biri aynan qaysi davrga mansubligi ham alohida oçiqlanmagan.
Metsamor Araks vodiysida, Taronik qişloği yaqinida, Yerevandan taxminan 35 kilometr janubi-ğarbda joylaşgan. Uning arki tabiiy qoyali tepalik ustida qurilgan. Tepalikni örab turgan mustahkam toş devorlar uning şaklini takrorlaydi. Şimol tomonda esa quyi şahar joylaşgan.
Yodgorlikning bunday tuzilişi ekspeditsiya iştirokçilarining 2013–2021-yillardagi işlarga bağişlangan ilmiy hisobotida tasvirlangan.
Metsamordagi tadqiqotlar hozirgi topilmalardan ança oldin boşlangan. Armaniston va Polşa arxeologlarining qöşma loyihasi 2013-yilda yölga qöyilgan. Varşava universiteti maʼlumotlariga köra, dastlabki uç qazişma mavsumidayoq olimlar qariyb uç ming yillik davrni - miloddan avvalgi III ming yillikdan milodiy I asrgaça bölgan vaqtni qamrab oluvçi sopol buyumlarni töplagan.
Öşa paytdagi topilmalar orasida obsidiandan yasalgan öq uçlari, suyak töğnoğiçlar va bigizlar, munçoqlar, bronza uzuklar hamda ot anjomlarining qismlari bölgan.
