Ukrainadagi urushning 623-kuni o‘tdi. Asosiy ma’lumotlar:

  • Yevrokomissiya Ukrainaning Yevroittifoqqa a’zoligi bo‘yicha muzokaralarni boshlashni tavsiya qildi.
  • Ayblov rossiyalik rassom ayol Sasha Skochilenkoni sakkiz yil muddatga ozodlikdan mahrum etishni so‘radi, u do‘konda mahsulotlarga narxlar o‘rniga urushga qarshi so‘zlar bitilgan qog‘ozlarni yopishtirib chiqqani uchun qo‘lga olingandi.
  • Odessada sud Xerson oblastining anneksiya qilingan qismi «gubernatori» Vladimir Saldoni sirtdan 15 yilga ozodlikdan mahrum etishga hukm qildi. Uni davlatga xiyonat qilish, kollaboratsionizm va Rossiyaning Ukrainaga qarshi qurolli tajovuzini oqlashda aybdor deb topishgan.
  • Rossiya ikki mamlakat o‘rtasidagi kelishuv muddati yakunlangani tufayli Gretsiyaning Moskvadagi elchixonasini yopdi.
  • Rossiya IIV Xalqaro jinoyat sudi sudyasi, Putinni hibsga olishga order bergan Serxio Xerardo Ugalde Godinesga qidiruv e’lon qildi.
  • Luhanskda «LXR militsiyasi» sobiq boshlig‘i Mixail Filiponenko avtomobilga o‘rnatilgan bomba portlashi oqibatida halok bo‘ldi.
  • Vladimir Putin rossiyalik investorlarning muzlatilgan aktivlarini xorijliklarniki bilan almashtirish to‘g‘risidagi farmonini imzoladi.

Kun kadri. Rostov-Donda ukrainalik harbiy mahbus 19 yil muddatga qamaldi

Rossiyada ukrainalik harbiylar tomonidan tinch aholi o‘ldirilishi bilan bog‘liq birinchi ish aprel oyida Rostov-Donda Janubiy harbiy okrug sudida ko‘rib chiqilishi boshlangandi. Ukraina qurolli kuchlari dengiz piyodasi Anton Cherednik Mariupol yaqinidagi Mirnoye posyolkasida yashovchi Oleksandr Piskunovni otib tashlashda ayblangan. Cherednikning tarixi haqida yozgan «Ґrati» nashri taxminiga ko‘ra, 2022 yil aprelida uni Mariupol yaqinida 501-batalyonning boshqa jangchilari bilan birgalikda qo‘lga olishgan, o‘shanda batalyon harbiylari qurshovga tushib qolgan va «Azov» polki hamda shaharning boshqa himoyachilari mudofaalanayotgan «Azovstal» zavodiga o‘ta olmagan.

Ish materiallariga ko‘ra, ukrainalik dengiz piyodasi qo‘lga olish chog‘idayoq tinch aholi vakilini otganini tasdiqlagan. Keyinroq asirdalik chog‘ida uni bir necha bor kamera qarshisida so‘roq qilishgan. Videoda ham Cherednik qotillik qilganini tan oladi, ammo hodisaning turli detallarini oshkor etadi. Masalan, birinchi safar u o‘zi o‘ldirgan kishi «palyanitsya» nima degani (ukrainchasiga non) haqidagi savolga javob bera olmaganini aytadi, boshqa safar esa — u javob bergani, ammo «joyidan qimirlagani», shundan keyin o‘t ochganini aytadi. Bu videolar nega yozib olgani noma’lum. Shuningdek, o‘sha vaqtda askarning advokati ham bo‘lgani aniq emas.