Toshkentdagi «Bunyodkor» stadionida 30 mingdan ortiq tomoshabin qarshisida kechgan milliy jamoamiz uchun yilning eng muhim to‘qnashuvida forslar birinchi bo‘limning o‘zida 13-daqiqada Rizoiyon va 38-daqiqada Toremiyning golidan keyin hisobda ikki to‘p farqi bilan oldinda edi – 0:2.
Srechko Katanets shogirdlari ikkinchi bo‘limda o‘yinda burilish yasashdi. Ayniqsa, Abbosbek Fayzullayev va Igor Sergeyev zaxiradan maydonga tushgach, vaziyat o‘zgardi. Oston O‘runov 52-daqiqada hisobni qisqartirdi – 1:2.
83-daqiqada esa Shukurov – Shomurodov – Fayzullayev – O‘runovning ajoyib kombinatsiyasini Sergeyev darvozaga yo‘llab, kambek muallifiga aylandi – 2:2.
Shu tariqa, O‘zbekiston 14 yil o‘tib, Toshkentda Eron bilan yana durang qayd eta oldi, ammo forslar poytaxtimizda o‘z tarixidagi mag‘lubiyatsiz seriyasini davom ettirishdi. Eron 4 ochko bilan guruhda peshqadamlikni saqlab qoldi, O‘zbekiston ham shuncha ochko va to‘plar nisbatiga ko‘ra 2-o‘rinda bormoqda. Turkmaniston va Hongkong esa durang (2:2) qayd etib, o‘z hisoblariga bir ochkodan yozib qo‘yishdi.
JCh-2026 va Osiyo Kubogi-2027 qo‘shma saralash bosqichi.
«E» guruhi. 2-tur. 21 noyabr
O‘zbekiston – Eron – 2:2
Bosh hakam: Muhammad Abdulla Hassan (BAA)
Gollar: Oston O‘runov 52, Igor Sergeyev 83 – Ramin Rizoiyon 13, Mehdi Toremiy 38.
O‘zbekiston: 1.O‘tkir Yusupov, 3.Hojiakbar Alijonov, 4.Farrux Sayfiyev, 5.Rustam Ashurmatov (21.Igor Sergeyev, 82), 7.Otabek Shukurov, 9.Odilbek Hamrobekov, 10.Jaloliddin Masharipov (22.Abbos Fayzullayev, 62), 11.Oston O‘runov, 14.Eldor Shomurodov, 15.Umarbek Eshmurodov, 23.Husniddin Aliqulov.
