O‘zbekistonda 2024 yil yanvar oyida qanday ob-havo sharoitlari kutilayotgani ma’lum qilindi.
2024 yilning birinchi oyi harorat tartibi bo‘yicha me’yorga yaqin, ba’zi joylarda me’yordan 1-1,5 darajaga yuqori bo‘ladi.
"O‘zgidromet" xabariga ko‘ra, yanvar quruq va nisbatan iliq ob-havo bilan boshlanadi. Yanvar oyi birinchi besh kunligida O‘zbekiston hududi bo‘yicha asosan yog‘ingarchiliksiz ob-havo bo‘lishi kutilmoqda. 1-3 yanvar kunlari kunduzgi havo harorati +6...+11 daraja atrofida, 4-5 yanvar kunlari esa 1-3 yanvarga nisbatan +3...+5 darajaga yuqori bo‘ladi.
Keyinchalik, oyning oxirigacha harorat kechalari +0...+5 darajadan -3...-8 darajagacha, kunduz kunlari +10...+15 darajadan +0...+5 darajagacha o‘zgarib turishi kutilmoqda. Harorat kechalari qisqa davrga -10...-13 darajagacha pasayishi va kunduz kunlari +16...+18 darajagacha ko‘tarilishi mumkin.
Yomg‘ir va qor ko‘rinishidagi yog‘ingarchiliklar yanvar oyining birinchi o‘n kunligi oxirida, shuningdek, ikkinchi va uchinchi o‘n kunliklar ayrim kunlarida kutilmoqda. Umuman olganda, oy uchun yog‘ingarchilik miqdori me’yor atrofida, ba’zi joylarda me’yordan kam bo‘lishi kutilmoqda.
