Germaniya iqtisodiyoti Sharqiy qo‘mitasida O‘zbekiston bilan ikki tomonlama aloqalarni sifat jihatidan yangi pog‘onaga ko‘tarish masalalari ko‘rib chiqildi.
O‘zbekiston elchixonasi xodimlari Germaniya iqtisodiyoti Sharqiy qo‘mitasi ijrochi direktori Mixael Xarms bilan uchrashuv o‘tkazdi, deb xabar bermoqda "Dunyo".
Uchrashuvda 2024 yilda ikki mamlakat o‘rtasida iqtisodiyot sohasida hamkorlikdagi qator loyiha va rejalar, ishbilarmon doira vakillari ishtirokida turli tadbirlarni tashkil etish masalalari muhokama qilindi.
Asosiy e’tibor joriy yil may oyida Germaniya yetakchi kompaniya va firmalari vakillaridan iborat delegatsiyasining O‘zbekistonga tashrifini tashkil etish, uning doirasida ikki mamlakat yetakchi kompaniyalar ishtirokida qo‘shma biznes-forum va B2B shaklidagi uchrashuvlar o‘tkazish masalalariga qaratildi.
Shuningdek, Germaniyaning tekstil, yengil sanoat, mashinasozlik, metallurgiya, oziq-ovqat va farmatsevtika sohalari bilan investitsion va savdo-iqtisodiy hamkorlik aloqalarini o‘rnatish maqsadida Namangan viloyatida "Farg‘ona vodiysi – Germaniya" formatida ishbilarmonlar konferensiyasini o‘tkazish masalalari xususida fikr almashildi.
Nemis tomoni Germaniyada o‘rta maxsus malakadagi kadrlarning keskin tanqisligi kuzatilayotgan bir davrda, O‘zbekiston yoshlarini dual kasbiy ta’lim asosida o‘qitish, kasb-hunar o‘rgatish va keyinchalik ishga joylashtirish borasida yaqindan hamkorlik qilishga tayyorligini ma’lum qildi.
Bundan tashqari, suhbatdosh mamlakat hududlari delegatsiyalarining Germaniyaga tashriflarini, shu jumladan, nemis kompaniya va banklari bilan yangi qo‘shma investitsiya loyihalari va eksport shartnomalarini tuzish yuzasidan muzokaralarni tashkil etishda ishtirok etishini ma’lum qildi.
