1 mlrd so‘m kompensatsiya va sudlanuvchining advokatidan navbatdagi iltimosnoma – “Dok-1 Maks” sudidan reportaj

{Yii::t(}

O'tkazib yuborish 6s

O'tkazib yuborish

Sudning 2024 yil 12 yanvar kuni o‘tkazilgan majlisida Farmatsevtika agentligining “Dok-1 Maks” bo‘yicha sudlanayotgan sobiq rahbariga nisbatan sud tibbiy ekspertizasi tayinlangani, bunga ayblanuvchi advokatining bu haqidagi so‘rovi sabab bo‘lgani aytilgandi.

24 yanvar kuni bo‘lib o‘tgan sud majlisida sudya Muso Yusupovning ma’lumot berishicha, tibbiy ekspertiza 15 yanvar kuni o‘tkazilgan bo‘lib, ekspertiza davomida sobiq amaldorning tanasida tan jarohatlari aniqlanmagan. Shuningdek, sudlanuvchidagi mavjud umurtqa pog‘onasidagi churra kasalligi uning hibsxonada saqlanishiga to‘sqinlik qilmasligi aytildi.  

Sudda jabrlanuvchilar tinglandi.

Siropning navbatdagi qurboni 2020 yil 19 oktyabrda tug‘ilgan Otabek Kamoliddinov. Jizzaxlik jabrlanuvchi ota ko‘rsatmasiga ko‘ra, u shamollagan bolasi uchun shifokor tavsiyasiga ko‘ra dorixonadan “Ambronol” olgan. Biroq sirop iste’molidan keyin bolaning ahvoli og‘irlashib, vafot etgan. 

“Ambronol” dorisini 2022 yil 26-27 dekabr kunlari bolam shamollagani uchun olib kelganman. Dorini 3 mahal ichirdim. 29 dekabr kunidan boshlab o‘g‘lim peshob chiqarmay qo‘ydi. Shundan so‘ng uni Baxmaldagi shifoxonaga olib bordim. Lekin u yerdagi shifokorlar davolay olishmasligini aytishdi”, deydi jabrlanuvchi ota.

Jabrlanuvchining aytishicha, Jizzaxda najot topa olmagach, uni Samarqandga jo‘natishgan. 

“Samarqand viloyat kasalxonasiga yo‘llanma berishdi. O‘sha yerda qon qusib, og‘iz-burnidan qon kelaverdi. To‘g‘ri reanimatsiya bo‘limiga yotqizishdi. Keyin esa dializga olishdi. Nima bo‘ldi, deb so‘rasam, buyraklari ishlamayapti, deyishdi. Ichirgan dorimizni olib borib berdik. Katta farzandlarim — qizim bilan o‘g‘lim ham ichgan edi, ahvoli og‘irroq bo‘lgani uchun kichkinasini olib borgandik.

5 marta dializ qilishgach, ozroq peshob chiqardi. Shundan so‘ng ahvoli juda og‘irlashib qoldi, bizga ko‘rsatmay ham qo‘yishdi. 8 yanvar kuni vafot etdi. 

Uy-joy uchun yig‘gan pulimni ishlatdim bolalarimni davolashga, hozir ijarada yashayman”, deydi jabrlanuvchi.

U sudda farzandini to‘liq davolatish uchun 1 mlrd so‘m kompensatsiya so‘radi. Bundan tashqari, navoiylik hamda qoraqalpog‘istonlik jabrlanuvchilarning qonuniy vakillari 1 mlrd va 200 mln so‘m kompensatsiya so‘rashdi.

Shuningdek, sudlanuvchi Farmagentlikning sobiq rahbari S.Kariyevning advokati F.Xudoyberganov sudga iltimosnoma kiritdi.

Unda O‘zbekiston qonunchiligi, Jahon Sog‘liqni Saqlash Tashkiloti (JSST) tavsiyalari va xalqaro standartlarda sirop ko‘rinishidagi dori vositalarida etilenglikol va dietilenglikol moddalarning mavjudligini tekshirish talab etilmagani haqida asoslar keltirilgan.

Sud iltimosnomani ish hujjatlariga qo‘shib qo‘ydi.

Ishda raislik qilayotgan sudya tez orada sud tergovi yakunlanishini ma’lum qildi.  

Sud ishi 26 yanvarga qadar tanaffus e’lon qildi.