O‘zbekistonda Koreya bilan birga qurilish materiallari sohasida laboratoriya barpo etiladi

"O‘zsanoatqurilishmateriallari" uyushmasi, "O‘zsanoatqurilishbank" va sohaga aloqador boshqa tashkilotlar vakillaridan iborat mamlakat delegatsiyasi amaliy safar bilan Janubiy Koreyada bo‘lib turibdi.

Foto: «Dunyo» AA

"Dunyo" xabariga ko‘ra, Koreya Respublikasi muvofiqlangan laboratoriyalari (KML) tashkilotida bo‘lib o‘tgan muloqot chog‘ida delegatsiya vakillari qurilish materiallari sifati hamda sinov laboratoriyasi faoliyati bilan yaqindan tanishdi.

Muzokaralar yakunida "O‘zsanoatqurilishmateriallari" uyushmasi va Janubiy Koreya muvofiqlangan laboratoriyalari o‘rtasida sinov laboratoriyasini tashkil etish bo‘yicha hamkorlik memorandumi imzolandi.

Zamonaviy laboratoriya barpo etilgach, 30 dan oshiq qurilish materiallarining 300 ga yaqin sifat ko‘rsatkichlari xalqaro standartlarda sinovdan o‘tkazilishi yo‘lga qo‘yiladi.

Janubiy Koreyalik hamkorlar bilan uchrashuv davomida ularga mamlakatda qurilish materiallari ishlab chiqarish sohasida xalqaro aloqalarni yanada rivojlantirish, xorijiy davlatlarda ishlab chiqarilgan zamonaviy texnologiyalar, jumladan, ilg‘or laboratoriya majmualarini olib kelib, kaolin xomashyosi hamda boshqa asosiy turdagi mahsulotlarni laboratoriya sinovlaridan o‘tkazish imkoniyatini yaratishga qaratilgan keng ko‘lamli ishlar amalga oshirilayotgani haqida ma’lumot berildi.