Sirdaryo o‘zanida noruda materiallarni qazib olishga muddatsiz moratoriy joriy qilinadi

1 maydan boshlab o‘zanidan noruda materiallarni qazib olishga muddatsiz moratoriy joriy qilinadigan daryolar (Chirchiq, Sangzor, Zarafshon, Norin, Qashqadaryo, Surxondaryo) ro‘yxatiga Sirdaryo daryosi ham qo‘shildi. Noqonuniy qazib olish ishlari natijasida tabiatga yetkazilgan zarar uchun javobgarlik kuchaytiriladi.

Foto: Ekologiya, atrof-muhitni muhofaza qilish va iqlim o‘zgarishi vazirligi

Prezidentning 2024 yil 11 mart kuni imzolagan farmoni bilan “Suv havzalarida noruda materiallarni qazib olishni tartibga solish chora-tadbirlari to‘g‘risida”gi farmonga o‘zgartirish va qo‘shimcha kiritildi.

2024 yil 1 maydan Sirdaryo daryosi o‘zanidagi noruda materiallarni qazib olishga muddatsiz moratoriy joriy qilinadi, shuningdek, noqonuniy qazib olish ishlari natijasida tabiatga yetkazilgan zarar uchun javobgarlik kuchaytiriladi.

Sirdaryo daryosining yuvilgan qirg‘oqlarini mustahkamlash, qirg‘oqbo‘yi mintaqasidagi buzilgan yerlarning tabiiy holatini qayta tiklash va reabilitatsiya qilish chora-tadbirlari amalga oshiriladi.

Eslatib o‘tamiz, 2024 yil 1 maydan boshlab o‘zanidan noruda materiallarni qazib olishga muddatsiz moratoriy joriy qilinadigan daryolar ro‘yxatiga dastlab Chirchiq, Sangzor, Zarafshon, Norin, Qashqadaryo va Surxondaryo daryolari kiritilgan edi. Yuqoridagi hujjat bilan bu ro‘yxatga Sirdaryo daryosi ham qo‘shildi.