28 iyul kuni Reuters va Associated Press agentliklari Mali shimolida, Jazoir bilan chegara yaqinida, mahalliy isyonchi tuareglar bilan to‘qnashuv oqibatida «Vagner» xususiy harbiy kompaniyasining sobiq jangchilari halok bo‘lgani haqida xabar tarqatdi.
BBC rus xizmatiga ko‘ra, vagnerchlar Malida 2021 yildan buyon harakatlanib keladi. O‘shanda davlat to‘ntarishi oqibatida hokimiyatga polkovnik Assimi Goita kelgan, shundan keyin mamlakatdan besh mingdan ortiq fransuz harbiylari kontingenti chiqarib yuborilgandi (ularni oldingi prezident Ibrohim Keyta ayirmachi tuareglarga qarshi kurashish uchun chaqirgan). Goita esa ularning o‘rniga vagnerchilarni taklif etadi.
Rossiyadagi Z-kanallar 20 iyuldan boshlab bir necha kun davomida so‘nggi 12 yil mobaynida Malining shimoliy qismini nazorat qilib kelgan va hatto 2012 yilda Azavad nomli alohida davlat tuzilganini e’lon qilgan ayirmachi tuareglar tez orada to‘liq tor-mor etilishini prognoz qila boshlagandi.
Mali hukumati bayonotlariga ko‘ra, operatsiyaning ilk kunlarida Mali armiyasi vagnerchilar bilan birgalikda muvaffaqiyat bilan ilgarilagan. Bir hafta oldin ular Jazoir bilan chegaradagi In-Afarak qishlog‘ini o‘z nazoratiga olgan.
25 iyuldan 26 iyulga o‘tar kechasi esa rossiyalik yollanma jangchilar karvoni Jazoir hududidagi Tin-Zauatin tomon harakatlana boshlagan.
Yollanma jangchilar bilan aloqador telegram-kanallar yozishicha, harbiylar ikki mamlakat chegarasidan ikki kilometr masofada turganida kuchli qum bo‘roni yopirilgan va kolonna harakati to‘xtab qolgan. Mahalliy isyonchilar esa bu sharoitdan foydalanib, vagnerchilarga pistirma qo‘ygan.
To‘qnashuv natijasi Rossiya tomoni uchun «olis yo‘nalishlar»dagi (Ukrainadagi urushni hisobga olmaganda) Suriyaning Dayr-az-Zor viloyati Hasham shahri yaqinidagi jangdan keyingi eng yirik yo‘qotish bo‘lgan. O‘shanda, 2018 yil fevralida vagnerchilar kolonnasi Amerikaning zarbdor vertolyotlari bilan o‘qqa tutilishi oqibatida 100 dan ortiq kishi halok bo‘lgandi.
Isyonchi tuareglar guruhi bayonotida Mali harbiy xizmatchilari va vagnerchilar «jonli kuch va texnikada katta yo‘qotishlarga uchragani» aytilgan — gap «o‘nlab» qurbonlar va yaralanganlar haqida boradi. Tuareglar qo‘mondonligi ma’lumotiga ko‘ra, jangda 54 nafar vagnerchi va malilik yetti nafar harbiy o‘ldirilgan. Mali armiyasi ikki harbiy o‘limi va yana 10 nafari yaralangani haqida xabar qilgan.
