Dohada HAMAS yetakchisining dafn marosimi oldidan xavfsizlik choralari kuchaytirildi

Tehrondagi suiqasdda halok bo‘lgan Falastinning HAMAS harakati siyosiy byurosi rahbari Ismoil Haniyaning dafn marosimi oldidan Dohada kuchaytirilgan choralar ko‘rildi.

Hamad xalqaro aeroportida tundan beri poytaxtga turli davlatlardan vakillar kelishi sababli uzun navbatlar kuzatilmoqda.

Dohadagi bir qator ko‘cha va shohko‘chalar transport harakati uchun yopilgan, juma namozi va janoza marosimi bo‘ladigan Muhammad bin Abdulvahhob masjidi atrofida xavfsizlik choralari kuchaytirilgan.

Masjid atrofiga ko‘plab mahalliy va xorijiy matbuot vakillari ham to‘plangan. 

Ismoil Haniyaning jasadi juma namozi va vidolashuv marosimidan keyin dafn etiladi.

Tehronda HAMAS yetakchisining o‘ldirilishi

Falastinning HAMAS harakati siyosiy byurosi raisi Ismoil Haniya Eron yangi saylangan prezidenti Mas’ud Pezeshkiyon inauguratsiya marosimida ishtirok etish uchun Tehronga kelgandi. 

Islom inqilobi muhofizlari korpusi 31 iyul kuni ertalab Eron poytaxtida Ismoil Haniya qarorgohiga zarba berilgani haqida ma’lumot tarqatdi. 

Eron va HAMAS Isroilni qotillikni uyushtirganlikda aybladi. Biroq Isroil rasmiylari voqeaga izoh berishdan o‘zlarini tiyib turibdi.

Ismoil Haniya 2017 yil 6 may kuni HAMAS siyosiy byurosi rahbari etib saylangan edi. U bu lavozimda Xolid Mashaal o‘rnini egalladi.