16-avgust, yakshanba kuni bo‘lib o‘tgan uchrashuv haqida Axios nashri va AFP agentligi bir-biridan mustaqil ravishda o‘z manbalariga tayanib xabar berdi.
Axios ma’lumotlariga ko‘ra, Kushner va HAMAS vakillari o‘rtasidagi muzokara qariyb 90 daqiqa davom etgan. Manbalar suhbatni «juda samarali» deb baholagan. Asosiy masala HAMASning qurolsizlanish bo‘yicha o‘z zimmasiga olgan majburiyatlarini amalda bajarishiga qaratilgan.
Nashr suhbatdoshining aytishicha, HAMAS rahbarlari Kushnerdan Donald Trampga harakat avval erishilgan kelishuvlarga sodiq qolishini yetkazishni so‘ragan.
AQSh tomoni bu pozitsiyani olqishlagan, biroq Vashingtonga faqat bayonotlar emas, balki amaliy harakatlar kerakligini ta’kidlagan.
«Biz aniq sa’y-harakatlarni ko‘rishni istaymiz, faqat so‘zlarni emas», degan manba muzokaralardagi AQSh pozitsiyasini izohlar ekan.
Manbaga ko‘ra, Kushner uchun HAMAS rahbarlarining bu majburiyatlarni shaxsan o‘z zimmasiga olishi muhim bo‘lgan. U HAMAS vakillariga, agar ular Isroil tomonidan ham kelishuvda ko‘zda tutilgan choralar amalga oshirilishini istasa, qurolsizlanish yo‘lida konkret qadamlar tashlashi kerakligini bildirgan.
Uchrashuvda kimlar qatnashdi?
Axios ma’lumotiga ko‘ra, muzokaralarda «Tinchlik kengashi» bosh direktori Nikolay Mladenov, Buyuk Britaniyaning sobiq bosh vaziri va kengash a’zosi Toni Bler, shuningdek, kengashning katta maslahatchilari Are Laytstoun va Liran Tankman ishtirok etgan.
HAMAS tomonidan harakat siyosiy byurosi rahbari Xalil al-Hayya qatnashgan. Uchrashuvda Misr Umumiy razvedka boshqarmasi rahbari Hasan Rashad, Qatar diplomati Ali al-Tavadi va ismi oshkor etilmagan yuqori martabali turkiyalik amaldor ham bo‘lgan.
Muzokaralarda qurolsizlanish tushunchasi faqat qurollarni topshirish bilan cheklanmasligi qayd etilgan. Axios manbasiga ko‘ra, HAMASdan G‘azo sektoridagi boshqaruv vakolatlarini Falastin texnokratik hukumatiga topshirish va kelajakda sektor boshqaruvida hech qanday rol o‘ynamasligini kafolatlash ham kutilmoqda.
Kushner Isroilga boradi
17-avgust kuni Jared Kushnerning Isroilga tashrif buyurishi va mamlakat bosh vaziri Binyamin Netanyahu bilan uchrashishi kutilmoqda. Axios yozishicha, muzokaralarda HAMASdan talab qilinayotgan choralarga javoban Isroil tomoni amalga oshirishi mumkin bo‘lgan «tegishli qadamlar» muhokama qilinadi.
