Xitoy avtomobil brendlarining O‘zbekiston avtomobil bozoridagi ulushi barqaror o‘sishda davom etmoqda. Xususan, o‘zining ilg‘or texnologiyalari va innovatsion dizayni bilan avtomobil ishqibozlariga yaxshi tanish bo‘lgan BAIC brendi O‘zbekistondagi faoliyatini kengaytirib, Toshkentda yangi subdilerlik markazini ochgani buning yaqqol namunasi hisoblanadi.
BAIC Xitoyning eng qadimgi va yirik avtomobil ishlab chiqaruvchilardan biri bo‘lib, uning tarixi 1958 yilga borib taqaladi. Kompaniya nafaqat Xitoy avtomobilsozlik sanoatida, balki dunyo miqyosida ham o‘z o‘rniga ega. Yillar davomida BAIC o‘z takliflarini, ya’ni yengil avtomobillardan tortib, yo‘ltanlamaslari va tijorat avtomobillariga qadar diversifikatsiya qilib, uni avtomobilsozlik sohasidagi ko‘p qirrali brendga aylantirdi.
BAIC avtomobillari zamonaviy dizayni, yoqilg‘i samaradorligi va ilg‘or texnologiyalarning uyg‘unligi bilan mashhur. Subdilerlik markazining ochilish kunida kompaniya mijozlar uchun: X7, BJ30 va U5 PLUS modellarini namoyish etdi. Ilg‘or texnologiyalar va innovatsion dizayn bilan ishlab chiqilgan ushbu avtomobillar BAIC’ning jahon bozorlarida o‘sib borayotgan ta’sirini aks ettiradi.
BAIC INTL kompaniyasi vitse-prezidenti Zhao Pengfei 66 yillik tarixga ega kompaniya Xitoyning yirik avtomobil ishlab chiqaruvchilaridan biri ekanligini ta’kidladi:
“Bugungi taqdimotdan boshlab, BAIC rasman O‘zbekiston bozoriga chiqadi. Bugun biz to‘rtta avtomobil modelini olib keldik va birinchi navbatda o‘zbek bozorida yangi modellarni taqdim etishni rejalashtiryapmiz. Kelasi yildan boshlab ichki yonuv dvigateliga ega avtomobillardan tashqari, gibrid va elektr avtomobillarini ham bosqichma-bosqich joriy etamiz.
Kelajakda biz O‘zbekistonni asosiy bozor sifatida ko‘rib chiqishni, shuningdek, BAIC korporatsiyasi uchun Markaziy Osiyodagi strategik va namunali bozor sifatida tan olishni rejalashtiryapmiz.
Biz O‘zbekiston bilan birga rivojlanishni niyat qilganmiz. Bugun bu yerda to‘rtta ajoyib avtomobil modeli namoyish etilmoqda.
Biz ishonamizki, U5 PLUS sedan modeli O‘zbekiston bozorida muhim ahamiyat kasb etadi. O‘zbekiston iste’molchilari ushbu modelning zamonaviy dizayni va shinam salonini albatta qadrlaydilar.
