Bojxona postida O‘zbekistonga olib kirilayotgan pnevmatik qurollar va 2,7 ming dona o‘qlar to‘xtatib qolindi 

Qoraqalpog‘istonda joylashgan “Dovut-ota” chegara bojxona postidan noqonuniy olib o‘tilayotgan pnevmatik qurollar va o‘qlar fosh etilgan. Bu haqda respublika bojxona boshqarmasi xabar bermoqda. 

Ma’lum qilinishicha, “Dovut-ota” chegara bojxona posti orqali Rossiyadan kirib kelgan kurerlik jo‘natmalari bojxona ko‘rigidan o‘tkazilganida yo‘lovchi tomonidan 4,5 mm pnevmatik to‘pponcha, tozalash uchun mo‘ljallangan anjom, 2 dona gazballon, 2 dona o‘qdon va 700 dona pnevmatik qurol uchun o‘qlarni hech qanday hujjatlarsiz olib kelinayotgani aniqlangan. 

Bundan tashqari, qo‘shni davlatdan mamlakatimizga kirib kelgan fuqaroning qo‘l yuklaridan 1 dona gazballonli to‘pponcha, 11 dona gazballon, 1 dona o‘qdon, 1 dona pnevmatik to‘pponcha uchun g‘ilof va 2000 dona pnevmatik to‘pponcha uchun temir sharikli o‘qlar borligi ma’lum bo‘lgan. 

Shuningdek, transport vositasining oldi tomonidagi o‘rindiqlar orasiga vazni salkam 3 kg bo‘lgan ov miltig‘i o‘qining kapsulalarini xufiyona tarzda yashirib olib o‘tishga urinish holatlari fosh etilgan.