Avstraliyada eng yirik sinagogaga o‘t qo‘yilishi terakt sifatida baholandi

Avstraliya politsiyasi Melburndagi Adass-Isroil sinagogasiga o‘t qo‘yishni terrorchilik akti sifatida baholamoqda, dedi Viktoriya politsiyasi komissari Sheyn Patton 9 dekabr, dushanba kuni. Avstraliya terrorizmga qarshi kurash byurosi ish bo‘yicha keyingi tergovga qo‘shiladi.

6 dekabr kuni erta tongda Avstraliyaning eng yirik sinagogalaridan biri — Adass-Isroilda yong‘in chiqdi. Guvohlarning huquq-tartibot idoralari vakillariga aytishicha, ular bir necha niqobli o‘t qo‘yuvchilar binoning devorlari va eshiklariga tez yonuvchi suyuqlik sepayotganini ko‘rgan. Yong‘in oqibatida bir kishi tan jarohati oldi, sinagoga binosiga jiddiy zarar yetdi.

Voqea ortidan Melburn politsiyasi shaharning yahudiylar yashaydigan hududlarida patrul xizmatini kuchaytirdi. Ayni damda o‘t qo‘yishda gumon qilingan uch shaxsni aniqlash bo‘yicha ish olib borilmoqda, dedi komissar Patton.

Isroilning sinagogaga o‘t qo‘yilishiga reaksiyasi

Isroil bosh vaziri Binyamin Netanyahu sinagogaga o‘t qo‘yilishiga keskin munosabat bildirdi va bu hodisani Avstraliya hukumati siyosatining «anti-Isroil kayfiyati» bilan bog‘ladi, ushbu davlat boshqa narsalar qatori BMTning Falastinni tan olish haqidagi rezolyutsiyasini qo‘llab-quvvatladi.

O‘tgan yilning oktyabr oyida Isroil va Hamas harakati o‘rtasida urush boshlanganidan beri Avstraliyada antisemitizm va islomofobiya kayfiyatidagi hodisalar ko‘paygan. Ayrim yahudiy tashkilotlari hukumat bu holatlarga yetarlicha faol javob bermayotganini aytgan.