Sherzod Asadov Qozog‘istonning yetakchi OAV holdingi asoschisi bilan uchrashuv o‘tkazdi

Prezident matbuot kotibi Sherzod Asadov Qozog‘istonning Tengrinews, Massaget, «Vesti», Juldiz FM, Tengri FM va boshqa ko‘plab yetakchi ommaviy axborot vositalarini birlashtirgan Alash Media Group holdingi asoschisi va bosh direktori Zaure Kazibayeva bilan uchrashuv o‘tkazdi.

Uchrashuvda ikki davlat rahbarlarining siyosiy irodasi va birgalikdagi sa’y-harakatlari tufayli O‘zbekiston—Qozog‘iston munosabatlari misli ko‘rilmagan darajaga ko‘tarilgani mamnuniyat bilan qayd etildi.

Asadovning yozishicha, samimiy ruhda o‘tgan uchrashuvda media sohasida o‘zaro manfaatli hamkorlikni rivojlantirishga oid masalalarning keng doirasi batafsil muhokama qilingan. Bu qardosh xalqlar o‘rtasidagi do‘stlik rishtalarini mustahkamlashga xizmat qilishi haqida yakdil fikr bildirilgan.

«Ommaviy axborot vositalarimizga qo‘shma loyihalarni amalga oshirishda, jumladan, kontent almashish, press-turlar uyushtirish, O‘zbekiston va Qozog‘istonning boy tarixiy va madaniy merosini xalqaro miqyosda ilgari surishda ularga har tomonlama ko‘maklashishga kelishib oldik», — deb yozadi prezident matbuot kotibi.