«Anora» - «Oskar»ning bu yildagi asosiy filmi bo‘ldi. Uning rejissyori Shon Beyker to‘rtta mukofotni qo‘lga kiritdi

Los-Anjyelesda «Oskar» Kinoakademiyasining 97-taqdirlash marosimi bo‘lib o‘tdi. Oqshom triumfatori «Anora» filmini suratga olgan rejissyor Shon Beyker bo‘ldi. U jami to‘rtta shaxsiy haykalchani qo‘lga kiritdi (ssenariy, montaj, rejissyorlik va eng yaxshi film uchun) — unga qadar bir kechada bu qadar ko‘p mukofotni faqat Uolt Disney qo‘lga kiritgan. Film uchun beshinchi statuetka esa kutilmaganda unda bosh rolni o‘ynagan aktrisa Mayki Medisonga nasib etdi (bu kategoriyada «Substansiya» filmi uchun mavsum favoritkasi Demi Murning ham nomzodi qo‘yilgandi, ammo u mukofotsiz qoldi.

Rejissyor Beykerga «Oskar»ni Kventin Tarantino topshirdi. «Kventin, agar sen Maykini «Bir kuni Hollivudda» filmida suratga olmaganingda, «Anora» ham bo‘lmasdi», dedi u.

«Bu haqiqatan ham mustaqil film», - dedi Beyker kechaning asosiy mukofotini qabul qilib olayotganda. U bilan birga kartinani yaratishda ishtirok etgan barcha aktyorlar, jumladan, rossiyalik Yura Borisov ham sahnaga chiqdi.

U «Anora» filmidagi Igor roli uchun «Ikkinchi plandagi eng yaxshi erkak aktyor» nominatsiyasida ishtirok etdi, ammo bu nominatsiyadagi mukofotni «Haqiqiy og‘riq» (A Real Pain) filmidagi ijrosi uchun Kiran Kalkin qo‘lga kiritdi.

«Ikkinchi plandagi eng yaxshi ayol aktyor» nominatsiyasi bo‘yicha «Oskar» mukofotini «Emiliya Peres» myuziklida Rita Mora Kastro rolini ijro etgan Zoi Saldana o‘ziniki qildi.

«Men immigrantlar farzandi ekanimdan faxrlanaman, - dedi u juda hayajonli nutqida. - Men kelib chiqishiga ko‘ra dominikanlik bo‘lgan va «Oskar» olgan birinchi ayolman va oxirgi emasligimni ham bilaman».

«Eng yaxshi aktyor» nominatsiyasida «Brutalist» dramasida Laslo Tota rolini ijro etgan Edriyen Broudi «Oskar»ni qo‘lga kiritdi.

Latviyalik rejissyor Gins Zilbalodisning toshqindan omon qolgan mushuk haqidagi «Oqim» (Flow) multfilmi eng yaxshi to‘liq metrajli animatsion film sifatida tan olindi.

Bu Latviyadan «Oskar» olgan birinchi kartinadir.

Eronlik rejissyorlarning «Sarv soyasida» (In the Shadow of the Cypress) kartinasi — eng yaxshi qisqa metrajli animatsion film bo‘ldi.

«Boshqa yer yo‘q» (No Other Land) kartinasi eng yaxshi hujjatli to‘liq metrajli film deb topildi. Bu filmda Iordan daryosining g‘arbiy sohilidagi falastinlik faol va isroillik jurnalist o‘rtasidagi do‘stlik haqida hikoya qilinadi.

Ushbu nominatsiyada, shuningdek, Rossiyaning keng ko‘lamli bosqini boshlanganida Xarkivda yashagan uch nafar ukrainalik rassom haqidagi hikoya qiluvchi «Chinni urushi» («Farforovaya voyna») kartinasi ham taqdim etilgandi.

Film uchun eng yaxshi qo‘shiq deb fransuz musiqachilari Kamiy va Kleman Dyukol, shuningdek, rejissyor Jak Odiar tomonidan yozilgan «Emiliya Peres» filmidagi El Mal kompozitsiyasi tan olindi. «Oskar»ni ularga Mik Jagger topshirdi.

Qolgan g‘oliblar

Eng yaxshi liboslar dizayni — Pol Teyzuell («Yovuz: G‘arb jodugari haqida ertak»)

Eng yaxshi moslashtirilgan ssenariy — Piter Stroxan («Konklav»)

Eng yaxshi grim va soch turmagi — Piyer-Olive Persen, Stefani Giyon va Merilin Skarselli («Substansiya»)

Eng yaxshi sahnalashtiruvchi rassom ishi — Neytan Krauli i Li Sandales («Yovuz: G‘arb jodugari haqida ertak»).

Eng yaxshi qisqametrajli hujjatli film — «Orkestrdagi yagona qiz» (The Only Girl in the Orchestra).

Eng yaxshi ovoz — «Dyuna: ikkinchi qism».

Eng yaxshi vizual effektlar — «Dyuna: ikkinchi qism».

Eng yaxshi o‘yinbop qisqametrajli film — «Men robot emasman».

Eng yaxshi operatorlik ishi — Lu Krouli («Brutalist»)

Xorijiy tildagi eng yaxshi film — «Men hali ham shu yerdaman», (I'm still here) (Braziliya)

Film uchun eng yaxshi musiqa — Deniel Blumberg («Brutalist»)

Eng ko‘p mukofotni qo‘lga kiritgan filmlar

«Anora» (Anora) — 5

«Brutalist» (The Brutalist)  — 3

«Yovuz: G‘arb jodugari haqida ertak» (Wicked) — 2

«Emiliya Peres» (Emilia Perez) — 2

«Dyuna: ikkinchi qism» (Dune: Part Two) — 2