Suriyada hukumat kuchlari va Asad tarafdorlari o‘rtasida to‘qnashuvlar avj oldi

Suriyaning Rossiya aviabazasi joylashgan Lataqiya viloyatida xavfsizlik kuchlari va ag‘darilgan prezident Bashar Asad tarafdorlari o‘rtasida shiddatli to‘qnashuvlar yuz berdi.

Qarorgohi Londonda joylashgan Suriya inson huquqlari monitoringi markazi (SOHR) ma’lumotlariga ko‘ra, janglarda kamida 70 kishi halok bo‘lgan. Tashkilot ma’lumotida qayd etilishicha, bu dekabr oyida Asad hokimiyatdan ag‘darilganidan beri eng qonli to‘qnashuvlardir.

SOHR ma’lumotlariga ko‘ra, halok bo‘lganlar orasida xavfsizlik xizmati xodimlari, Asadga sodiq jangchilar, shuningdek, tinch aholi vakillari bor.

«Sohil hududida mudofaa vazirligi, ichki ishlar vazirligi xodimlari va ag‘darilgan rejim armiyasi jangarilari o‘rtasidagi qonli to‘qnashuvlarda 70 dan ortiq odam halok bo‘ldi, o‘nlab odamlar yaralandi va asirga olindi», — deyiladi SOHR xabarida.

Suriyadagi Step axborot agentligi keltirgan boshqa ma’lumotlarga ko‘ra, hukumat qo‘shinlari «rejimning 70 ga yaqin sobiq jangarisi»ni o‘ldirgan, 25 dan ortig‘i esa asirga olingan.

Ijtimoiy tarmoqlarda ko‘chalarda tinch aholi vakillari bo‘lgan o‘nlab kishilarning jasadlari yotgani aks etgan kadrlar tarqalmoqda.

Payshanba kuni Suriyaning Sana agentligi xabar berishicha, ag‘darilgan prezident tarafdorlari O‘rta Yer dengizi sohilidagi Jyebla shahri hududidagi blokpostlardan biriga hujum qilgan.

Bu joy yaqinida Rossiyaning «Xmeymim» aviabazasi joylashgan. Undan uncha uzoq bo‘lmagan Tartusda, shuningdek, boshqa hududlarda, jumladan, Homs va Halabda to‘qnashuvlar yuz bergani haqida xabarlar tarqaldi.

Lataqiya viloyatida komendantlik soati joriy etildi, mintaqaga Damashqdan qo‘shimcha kuchlar yuborilgan.

Suriya davlat nashrlari avvalroq o‘tish davri hukumati mudofaa vazirligi vakili Hasan G‘anining Asad tarafdorlariga murojaatini tarqatgan edi.

«Minglab odamlar qurollarini tashlab, o‘z oilalariga qaytishga qaror qilishdi, ba’zilari qotillar va jinoyatchilarni himoya qilib, qochishda va o‘lishda davom etmoqda. Tanlov aniq: qurolni tashlash yoki muqarrar taqdirni qarshi olish», — dedi u.

Lataqiyadagi xavfsizlik xizmati vakili Mustafo Kneyfati «yaxshi rejalashtirilgan va qasddan uyushtirilgan hujum» davomida bir necha guruh ularning pozitsiyalariga hujum qilgani, natijada «ko‘plab harbiy xizmatchilar» halok bo‘lgani va yaralanganini aytdi, ammo qurbonlar soniga aniqlik kiritilmadi.

«Biz mintaqada barqarorlikni tiklaymiz va odamlarimizning mol-mulkini himoya qilamiz», — deya uning so‘zlaridan iqtibos keltiradi AFP.

Lataqiya oblastida hokimiyatdan ag‘darilgan prezident Bashar Asad mansub bo‘lgan alaviylarning katta jamoasi yashaydi.

Alaviylarning vakillari mamlakatda hokimiyat almashganidan beri, ayniqsa, qishloq joylarda ta’qibga uchrayotganidan shikoyat qilishgan.