Qozog‘iston va O‘zbekiston chegarasida sanoat kooperatsiyasi markazi tashkil etiladi

Qozog‘iston va O‘zbekiston chegarasida sanoat kooperatsiyasi markazi barpo etiladi.

"Kazinform" xalqaro axborot agentligi ma’lumotiga ko‘ra, Qozog‘iston parlamenti majlisi deputatlari "Qozog‘iston hukumati va O‘zbekiston hukumati o‘rtasida "Markaziy Osiyo" sanoat kooperatsiyasi xalqaro markazi faoliyatini tartibga solish to‘g‘risidagi bitimni ratifikatsiya qilish haqida"gi qonun loyihasini ma’qulladi.

Qozog‘iston savdo va integratsiya vaziri Arman Shaqqaliyev ta’kidiga ko‘ra, kelishuv Qozog‘iston va O‘zbekiston o‘rtasidagi ikki tomonlama hamkorlik bo‘yicha hukumatlararo komissiyaning 20-yig‘ilishi qarorini amalga oshiradi.

Markaz "Atameken" (Qozog‘iston) va "Guliston" (O‘zbekiston) nazorat-o‘tkazish punktlari yaqinida joylashgan bo‘lib, ishlab chiqarish maydonlari, omborlar, shuningdek, transport infratuzilmasini o‘z ichiga oladi. Bu yuk tashishni tezlashtiradi, logistika xarajatlarini kamaytiradi, yetkazib berish zanjiri ishtirokchilari sonini kamaytiradi, iste’molchilar uchun mahsulotning yakuniy tannarxini pasaytiradi, yetkazib berish tezligini oshiradi va "Shimol-Janub" yo‘lagi doirasida ishlab chiqarish kooperatsiyasini rivojlantiradi.

Obektning umumiy maydoni 100 gektarni tashkil etadi, shundan 50 gektar Qozog‘iston, 50 gektar O‘zbekiston qismidir. Muayyan hududga mintaqaviy sanoat zonasi maqomi beriladi.

"Kazinform" manbasida ta’kidlanishicha, markaz infratuzilmasi budjetdan tashqari mablag‘lar hisobidan barpo etiladi.