Navro‘zda havo iliq bo‘lishi kutilmoqda

20 mart, payshanba kuni O‘zbekiston bo‘yicha quruq va juda iliq ob-havo saqlanib turadi. Kunduz kunlari havo +25…+27 darajagacha, ba’zi joylarda +30 darajagacha ko‘tariladi, deya xabar berdi O‘zgidromet.

21 mart kuni respublika hududining katta qismida Navro‘z bayrami qulay ob-havo sharoitida o‘tadi, faqat respublika shimolida ba’zi joylarda yomg‘ir yog‘adi. Kunduzgi havo harorati +27…+30 daraja atrofida bo‘ladi.

Shanba va yakshanba kunlari respublikaning g‘arbiy hududlariga nam va nisbatan salqin havo massalari kirib kelishi boshlanadi. 22–23 mart kunlari Qoraqalpog‘iston Respublikasi, Xorazm, Buxoro, Navoiy viloyatlarida ba’zi joylarda yomg‘ir yog‘adi. Ayrim tog‘li hududlarda ba’zi joylarda yomg‘ir yog‘adi, baland tog‘larda qorga aylanadi.

Respublikaning qolgan hududlarida quruq ob-havo bo‘lishi kutilmoqda. Ushbu kunlarda havo harorati asta-sekin pasayadi va +22…+27 darajani tashkil etadi.

Sharqiy shamol yo‘nalishini o‘zgartirib, g‘arbdan 7–12 metr/soniya tezlikda esadi, ba’zi joylarda 13–18 metr/soniyagacha kuchayadi.

Toshkent shahrida 20–23 mart kunlari yog‘ingarchilik kutilmaydi. Shamol sharqdan 3–8 metr/soniya tezlikda esadi, 21 va 23 martda 10–12 metr/soniyagacha kuchayishi mumkin.

Harorat asosan kechalari +12…+14 daraja, kunduz kunlari +26…+28 daraja bo‘ladi.