Diplomatlar o‘zbek xalqini Navro‘z ayyomi bilan tabrikladi

AQShning O‘zbekistondagi elchisi Jonatan Xenik o‘zbek xalqini Navro‘z ayyomi bilan tabrikladi.

«Avvalo, O‘zbekiston prezidenti va hukumatining mamlakatda keng qamrovli va ortga qaytmas islohotlarni amalga oshirishga qaratilgan faoliyati meni hayratda qoldirdi. Biz iqtisodiyotning jadal rivojlanishi, shuningdek, O‘zbekistonni savdo va investitsiyalar uchun istiqbolli yo‘nalish sifatida ko‘rayotgan Amerika kompaniyalarining qiziqishi ortib borayotganini ko‘ryapmiz.

Navro‘z nafaqat yangilanish va farovonlik timsoli bo‘lgan ajoyib bahor bayrami, balki erishilgan yutuqlarni nishonlash uchun muhim fursatdir. Fursatdan foydalanib, O‘zbekiston fuqarolariga Navro‘z bayrami fayzli bo‘lishini chin qalbimdan tilayman!» degan AQSh elchisi.

Shuningdek, Ozarboyjonning O‘zbekistondagi elchisi Guseyn Guliyev o‘zbek xalqini ushbu bahor bayrami bilan tabrikladi.

«O‘zbekiston xalqini bahor, yangilanish va bunyodkorlik ramzi – Navro‘z olam bilan chin qalbimdan tabriklayman. Bu yorqin bayramda o‘zbek xalqining ulug‘vorligi, chuqur an’analari, matonati va ravnaqiga intilishi o‘z ifodasini topgan.

…Qardosh O‘zbekiston xalqiga tinchlik, farovonlik va yanada muvaffaqiyatlar tilayman», deydi elchi.

Buyuk Britaniyaning O‘zbekistondagi elchisi Timoti Smart ham o‘zbekistonliklarni Navro‘z ayyomi bilan tabrikladi.

«Bu yerda bo‘lish va Navro‘z bayramini, ayniqsa, shunday ajoyib davrda nishonlash men uchun katta sharafdir. Sakkiz yillik islohotlar O‘zbekiston o‘z mavqeyini mustahkamlash yo‘lidagi ta’sirchan yo‘ldan dalolat beradi. Mamlakat jahon sahnasiga qanday ishonch bilan kirib kelayotgani, butun Markaziy Osiyo mintaqasiga naf keltirayotgani kishini hayratga soladi. Ayniqsa, O‘zbekistonning ta’lim va madaniyat sohasidagi yutuqlari e’tiborga loyiq.

Yilning eng sevimli bayrami – Navro‘zni shu yerda, go‘zal Yangi O‘zbekistonda prezident va diplomatik hamjamiyat bilan birgalikda nishonlash katta sharafdir. Bu voqea, shubhasiz, diplomatik taqvimdagi eng muhim bosqichlardan biridir. Navro‘z ayyomingiz muborak bo‘lsin!»

Shuningdek, bayram tadbirlarida qatnashgan Belarus elchisi Aleksandr Ogorodnikov ham o‘zbek xalqini ushbu bahor ayyomi bilan tabrikladi.

«Bugun bu yerda ilk bor bo‘lib, Navro‘z barchani jipslashtirib, qalblarni iliqlik, yorug‘lik va kelajakka beg‘ubor ishonch hislari bilan to‘ldirganini ko‘rib chin dildan quvondim.

O‘zbekiston, ayniqsa, iqtisodiy sohada ajoyib o‘sishni ko‘rsatmoqda va ko‘plab davlatlar uchun haqli ravishda namuna bo‘lyapti. Davlat rahbari rahnamoligida sanoatning asosiy tarmoqlarini modernizatsiya va mustahkamlashga qaratilgan aniq va uzoqni ko‘zlagan rivojlanish strategiyasi shakllantirildi. Bugun respublikada amalga oshirilayotgan jadal o‘zgarishlar mamlakat rahbariyatining uzoqni ko‘ra bilishi, o‘zbek xalqining azmu shijoatidan dalolat beradi.

Yasharish, yangilanish ayyomi – Navro‘z chinakam xalq bayrami bo‘lib, u haqida faqat hayrat bilan gapirish mumkin. Bayramingiz muborak bo‘lsin, O‘zbekiston xalqi!» deya Belarus elchisining so‘zlarini keltirmoqda Dunyo AA.