O‘zbekiston va Qozog‘iston poytaxtida ikki mamlakat savdo markazlari qurilishi mumkin

Toshkentda Qozog‘istonning, Ostonada esa O‘zbekistonning savdo markazi qurilishi mumkin.

"Kazinform" xalqaro axborot agentligi ma’lumotiga ko‘ra, Qozog‘istonning Toshkentdagi elchixonasida O‘zbekistonda faoliyat olib borayotgan qozog‘istonlik tadbirkorlar bilan uchrashuv o‘tkazildi. Unda ikki davlat o‘rtasidagi iqtisodiy aloqalarni mustahkamlashga xizmat qiladigan qo‘shma loyihalarni amalga oshirish imkoniyatlari muhokama qilindi.

Ma’lum qilinishicha, o‘tgan yili Qozog‘istonning Oqtov shahrida O‘zbekiston mahsulotlarining distribyutorlik markazi ochildi. Mazkur markazi orqali O‘zbekistondan Qozog‘iston bozoriga qishloq xo‘jaligi tovarlari, jumladan, oziq-ovqat mahsulotlarini eksport qilinmoqda. Bundan tashqari, mazkur habdan boshqa mamlakatlarga eksport qilinayotgan O‘zbekiston mahsulotlarini vaqtincha saqlash uchun foydalaniladi. 

"O‘tgan yozda Qozog‘istonda hukumatlararo komissiya yig‘ilishi bo‘lib o‘tdi. Tadbir doirasida Ostona shahri hokimi bilan samarali uchrashuv o‘tkazdik va hamkorlik memorandumini imzoladik. Ushbu hujjatda, O‘zbekiston tomoniga Ostona shahridan yer, xuddi shunday tartibda Toshkent shahridan Qozog‘iston uchun yer ajratish ko‘zda tutilgan. Savdo markazlari ushbu hududlarda qurilishi kerak. Keyinchalik ushbu markazlar orqali O‘zbekiston tovarlarini Ostonada, Qozog‘iston mahsulotlarini esa Toshkentda sotish mumkin bo‘ladi", – deya O‘zbekiston Savdo-sanoat palatasi raisi o‘rinbosari Dilshod Rasulov so‘zlaridan iqtibos keltirilgan maqolada.