Madaniyat va san’at sohasidagi iqtidorli yoshlar rag‘batlantiriladi

«Ijodkor yoshlarni qo‘llab-quvvatlash va rag‘batlantirishning qo‘shimcha chora-tadbirlari to‘g‘risida»gi hukumat qarori qabul qilindi.

Qarorga ko‘ra, madaniyat va san’at sohasida iqtidorli yoshlarni qo‘llab-quvvatlash maqsadida quyidagilar yo‘lga qo‘yiladi:

- ijodkor yoshlar faoliyatini muvofiqlashtiruvchi yagona platforma joriy etiladi hamda «ERP madaniyat» yagona boshqaruv tizimiga integratsiya qilinadi;

- madaniyat sohasida sun’iy intellektdan hamda zamonaviy texnologiyalardan foydalanish bo‘yicha «Ijodiy texnolaboratoriya» tashkil etiladi;

- umumiy o‘rta va o‘rta maxsus ta’lim tashkilotlarida «Ijodkor yoshlar klubi» faoliyati yo‘lga qo‘yiladi;

- «Madaniyat volontyorlari» ijtimoiy harakati faoliyati yo‘lga qo‘yiladi.

Shuningdek, har yili jahonning kamida 4 nafar yetakchi mutaxassisi va taniqli san’atkori o‘quv jarayonlariga jalb etiladi hamda kamida 4 nafar ijodkor yoshlar xorijiy mamlakatlarga tajriba almashish uchun yuboriladi.

Madaniyat va san’at yo‘nalishidagi «Start-Up» loyihalari uchun BHM 100 baravarigacha miqdorida ijodiy grantlar ajratiladi.

2026 yildan Madaniyat vazirligi tomonidan tasdiqlanadigan yillik kalendar-reja asosida yoshlar uchun tanlov va festivallar tashkil etiladi.