Andijonda temiryo‘ldagi sisternaga chiqqan erkakni tok urdi

Andijon viloyatidagi Poytug‘ bekatida 10 iyun kuni temiryo‘ldagi sisternaga chiqqan erkakni tok urdi. Bu haqda «O‘zbekiston temir yo‘llari» matbuot xizmati xabar berdi.

Ma’lum bo‘lishicha, begona fuqarolardan biri stansiya hududiga kirib, ikkinchi yo‘lda bo‘sh turgan sisternaga chiqib olgan. U kontakt tarmog‘idagi kuchlanish ta’siriga tushib, yerga yiqilgan.

Stansiya navbatchi xodimi tez tibbiy yordam brigadasini chaqirgan. Jabrlanuvchiga zarur tibbiy yordam ko‘rsatilib, tibbiyot muassasasiga olib borilgan.

Ijtimoiy tarmoqlarda tarqalgan videoda ushbu shaxs vagon yuqorisida tanasi yonishni boshlagan holda yopishib qolgani, so‘ng o‘zini pastga tashlagani ko‘rinadi.

O‘zbekiston temiryo‘llari fuqarolardan temiryo‘l va infratuzilma yaqinida xavfsizlik qoidalariga qat’iy rioya qilish kerakligini eslatib o‘tdi. «Temiryo‘l infratuzilmasi obektlariga o‘zboshimchalik bilan kirish hayot va sog‘liq uchun jiddiy xavf tug‘diradi», – deyiladi xabarda.