Markaziy bankning banklarda tekshirish o‘tkazish tartibi o‘zgaradi

Markaziy bank boshqaruvi qarori bilan tasdiqlangan O‘zbekiston Respublikasi Markaziy banki tomonidan banklar va ularning filiallarida inspeksiya (tekshirish) o‘tkazish tartibi to‘g‘risidagi nizomga o‘zgartirishlar kiritiladi.

Unga ko‘ra, nizom «O‘zbekiston Respublikasining Markaziy banki to‘g‘risida»gi va «Banklar va bank faoliyati to‘g‘risida»gi qonunlariga muvofiq Markaziy bank tomonidan banklar va ularning filiallarida inspeksiya (tekshiruv) o‘tkazish tartibini belgilaydi.

Banklar va ularning filiallari faoliyatiga xos tavakkalchilikni baholash, iqtisodiy normativlarga rioya qilinishi, ularga belgilangan me’yorlarning to‘g‘ri hisoblanishi ahvolini tekshirish amalga oshiriladi. Bunda tashqi omillarning bank moliyaviy holatiga ta’siri aniqlanadi hamda bank kapitali, aktivlari sifati, boshqaruvi, daromadlari hamda likvidliligi tekshiriladi.

Kompleks inspeksiya qilish (tekshirish)lar yoki alohida masalalar yuzasidan inspeksiya qilish (tekshirish)lar davomida aniqlangan xato va kamchiliklarning banklar va ularning filiallari tomonidan bartaraf etilishi ustidan nazorat tartibida tekshirish masofadan nazorat qilish natijalaridan kelib chiqib, Markaziy bank Bank nazorati qo‘mitasi qaroriga asosan o‘tkazilishi mumkin.