15-oktabr kuni Markaziy bankda “Moliyaviy xizmatlarda komissiyalar: xarajatlar, raqobat va isteʼmolchi manfaatlari” mavzusida davra suhbati boʻlib oʻtdi. Unda tijorat banklari, toʻlov tizimlari, toʻlov tashkilotlari va OAV vakillari qatnashdi.
Komissiyalar yuzasidan bahslar bilan birga, uchrashuvda mijozning bir bankka bogʻlanib qolishini kamaytirish, pul oʻtkazishning muqobil usullarini rivojlantirish va yangi xizmatlarni ishga tushirish muddatlari haqida ham maʼlumot berildi.
Oʻz kartalari oʻrtasida bepul oʻtkazma qachon ishlaydi?
Iqtisodchi Otabek Bakirov jismoniy shaxslarning oʻziga tegishli bank kartalari orasida komissiyasiz pul oʻtkazishini taʼminlash vazifasi qoʻyilganini eslatdi. U bunday imkoniyat banklar oʻrtasidagi raqobatga ham taʼsir qilishini aytdi.
“Bu davlat rahbari tomonidan 5-may 2026-yilda qoʻyilgan vazifa. Oʻqib beraman: jismoniy shaxslarning oʻz bank kartalari oʻrtasidagi pul oʻtkazmalarini tezkor toʻlovlar tizimi doirasida komissiyasiz amalga oshirish, deb aniq-tiniq vazifa qoʻyilgan. Nima uchun oʻz kartalari orasidagi oʻtkazmalarni nollashtirishni muhim deb hisoblayman? Bu banklar va toʻlov tashkilotlari oʻrtasidagi raqobatni oshiradi”, - dedi Bakirov.
Uning fikricha, mijoz oʻz mablagʻini banklar orasida qoʻshimcha xarajatsiz koʻchira olsa, ishonchli va qulay shartlarni taklif qiladigan banklarga resurs jalb qilish osonlashadi. Qolgan ishtirokchilar ham mijozni saqlab qolish uchun xizmat shartlarini yaxshilashga majbur boʻladi.
Markaziy bank tomonidan berilgan javobda tegishli hujjat Vazirlar Mahkamasiga kiritilgani aytildi.
“Me-to-me boʻyicha topshiriq boʻlgan edi, deganingizga: bu xizmat doirasida foydalanish uchun kelgan hujjat edi. Ikki hafta muddat ichida Vazirlar Mahkamasiga kiritilishi soʻralgan. Adashmasam, 11 yoki 12 kun ichida Vazirlar Mahkamasiga kiritilgan”, - deyiladi MB vakili.
Biroq davra suhbatida ushbu imkoniyatning mijozlar uchun qachondan ishlashi boʻyicha aniq sana aytilmadi.
Bakirov yangi xizmatning infratuzilmasiga ham eʼtibor qaratdi. U oʻz kartalari orasidagi oʻtkazmalarni Markaziy bank infratuzilmasidan foydalangan holda tashkil qilish tarafdori ekanini bildirdi.
