Lazer epilyatsiyasi teri saratonga sabab bo‘ladimi? Mutaxassislar javob berdi

So‘nggi yillarda O‘zbekistonda ham ayollar orasida keng ommalashayotgan kosmetologik muolajalardan biri - lazer epilyatsiyasi. Bu muolaja og‘riqsizligi, uzoq muddatli natijasi va ortiqcha tuklarni mutlaqo yo‘q qilish qobiliyati bilan boshqa usullardan farqlanadi.

Biroq internetda va ijtimoiy tarmoqlarda “lazer epilyatsiyasi teri saratoniga olib kelishi mumkin” degan mish-mishlar tarqalmoqda. Unda qaysi darajada haqiqat bor? Bu haqda AQSh Milliy tibbiyot instituti ma’lumotlariga asoslanib tahlil qilamiz.

Lazer muolajalari — qanchalik xavfsiz?

Ko‘pchilik kosmetologiya markazlarida qo‘llanadigan lazer va IPL (ko‘chli impulsli yorug‘lik) texnologiyalari bugungi kungacha xavfsiz hisoblanadi. Biroq muolaja to‘g‘ri bajarilmasa, ayrim salbiy ta’sirlar kuzatilishi mumkin:

terida qizarish, teri ko‘chishi;
vaqtinchalik pigmentatsiya o‘zgarishlari (ocharishi yoki to‘qlashishi);
noo‘rin va kuchli ta’sir natijasida — po‘st va chandiq qolishi.

Bu asoratlar asosan mutaxassis bo‘lmagan, litsenziyasiz markazlarda yoki teriga moslashtirilmagan uskunalarda bajarilgan holatlarda yuz beradi.

Saraton xavfi: haqiqat yoki mish-mish?

Lazer va IPL tizimlari ionlashtiruvchi bo‘lmagan nurlanishdan foydalanadi. Bu nurlanish turi DNK zanjirlarini shikastlamaydi, demakki, saraton xurujiga olib kelmaydi.

Teri saratonlarini keltirib chiqaruvchi asosiy omillar quyidagilardir:

ultrabinafsha (UF) nurlanishning yuqori dozada va uzoq vaqtda ta’siri (kuyosh nurlari yoki solyariy);
irsiy omillar;
immunitet muvozanatining buzilishi;
zararli moddalar bilan to‘g‘ridan to‘g‘ri aloqada bo‘lish.

Ayniqsa, xavfli teri saraton turi organizmdagi melanin ishlab chiqaruvchi hujayralar (melanotsitlar) muvozanatidan chiqqanida rivojlanadi. U ko‘pincha teridagi xollar orqali namoyon bo‘ladi.

Xulosa: lazer epilyatsiyasi bilan onkologiya o‘rtasida to‘g‘ridan to‘g‘ri bog‘liqlik yo‘q

Hozircha lazer epilyatsiyasi teri saraton kasalligiga olib kelganini tasdiqlovchi hech qanday ilmiy dalil mavjud emas. Ushbu muolaja tibbiy standartlarga amal qilingan holda, litsenziyaga ega kosmetologiya markazlarida bajarilsa, xavfsiz hisoblanadi.

Biroq har qanday kosmetik muolaja oldidan teri shifokori yoki kosmetolog bilan maslahatlashish, teri turi va individual xususiyatlardan kelib chiqib qaror qabul qilish tavsiya etiladi.

Eslatma: Agar terida shubhali o‘zgarishlar (jarohatlar, ko‘zga yaqqol ko‘ringan o‘simtalar, o‘zgaruvchan xollar va hokazo) kuzatilsa, zudlik bilan dermatologga murojaat qilish kerak.