Visual Capitalist taqdim etgan infografika Jorjtaun Ayollar, tinchlik va xavfsizlik institutining «Ayollar, tinchlik va xavfsizlik» indeksi ma’lumotlariga asoslangan. Reytingga jami 181 davlat kiritilgan.
Indeks mamlakatlarda ayollarning jamiyatdagi ishtiroki, xavfsizligi va imkoniyatlarini aks ettiruvchi ko‘rsatkichlar asosida shakllantirilgan. Eng yuqori natija 1 ballga yaqin hisoblanadi, biroq reytingdagi hech bir davlat 1 ballga yetmagan.
Eng yuqori ko‘rsatkichlar asosan Shimoliy Yevropa mamlakatlarida qayd etilgan. Reytingda birinchi o‘rinni Daniya egallab, 0,939 ball to‘plagan.
Keyingi o‘rinlarda Islandiya - 0,932 ball, Norvegiya - 0,924, Shvetsiya - 0,924 va Finlandiya - 0,921 ball bilan joylashgan.
Shu tariqa, reytingning dastlabki beshta o‘rnini Shimoliy Yevropa davlatlari egallagan. Lyuksemburg, Belgiya va Niderlandiya ham 0,9 balldan yuqori natija ko‘rsatgan.
Reytingning qarama-qarshi tomonida esa Afg‘oniston joylashgan. Mamlakat 0,279 ball bilan ayollar uchun sharoitlar bo‘yicha eng past natijani qayd etgan.
Shuningdek, Yaman - 0,323, Markaziy Afrika Respublikasi - 0,362, Suriya - 0,364, Sudan - 0,397 va Haiti - 0,399 ball bilan reytingning quyi qismida joylashgan.
Rossiya esa 0,718 ball bilan 75-o‘rinni egallagan.
Taqqoslash uchun, Armaniston 0,762 ball, Belarus 0,739 ball, Qozog‘iston 0,722 ball va Ozarboyjon 0,653 ball natija qayd etgan.
