2027-yilgi FIFA ayollar o‘rtasidagi Jahon chempionati qit’alararo pley-off turnirining dastlabki bosqichiga qur’a tashlandi.
Unga ko‘ra, O‘zbekiston ayollar milliy jamoasi saralashning ushbu bosqichida Papua Yangi Gvineya, Gana va Janubiy Afrika Respublikasi jamoalari bilan bahs olib boradi.
Dastlabki bosqich 2026-yilning noyabr–dekabr oylarida markazlashtirilgan bitta manzilda tashkil etiladi. Dastlabki bosqich yakuniga ko‘ra 2 ta terma jamoa final pley-off bosqichiga yo‘l oladi.
Hal qiluvchi pley-off bosqichi 2027-yil fevral oyida markazlashgan holda o‘tkaziladi. Unda dastlabki bosqichdan chiqqan ikki jamoaga KONKAKAFdan 2 ta, KONMEBOL va UYeFAdan bittadan jamoa qo‘shiladi.
Jami 6 ta milliy jamoa qur’a orqali 3 ta yo‘nalishga taqsimlanadi. Har bir yo‘nalishda bittadan hal qiluvchi pley-off uchrashuvi o‘tkaziladi. Ushbu uchrashuvlarda g‘alaba qozongan 3 ta jamoa ayollar o‘rtasidagi Jahon chempionati yo‘llanmasini qo‘lga kiritadi.
Ayollar o‘rtasidagi Jahon chempionati 2027-yil 24-iyun – 25-iyul kunlari Braziliyada bo‘lib o‘tadi.
