Armaniston sobiq bosh vaziri Jyennifer Lopes konsertiga qilingan xarajatlarni konstitutsiyaga zid deb atadi

Armaniston sobiq bosh vaziri Grant Bagratyan amerikalik pop-yulduz Jyennifer Lopesning Yerevandagi konserti uchun mamlakat budjetidan millionlab dollar ajratilganini konstitutsiyaga zid deb atadi.

"Jyennifer Lopesning Yerevandagi chiqishi uchun davlat budjetidan 6 million dollar ajratilishi konstitutsiyaga zid. Davlat tadbirkorlik bilan shug‘ullanmaydi, bu juda katta korrupsion xatarni o‘z ichiga oladi. Budjet puli butun jamiyatga tegishli, konsertda esa cheklangan sonli fuqarolar ishtirok etdi. Bu ish bilan prokuratura, korrupsiyaga qarshi organlar shug‘ullanishi kerak" – dedi Bagratyan.

Uning ta’kidlashicha, mamlakat ta’lim, fan, madaniyat va sport vaziri Janna Andreasyan qanday asoslarga ko‘ra Lopesning konsertini tashkil etishga qaror qilgani yuzasidan javob berishi, moliya vaziri Vage Ovannisyan esa davlat budjetida ko‘zda tutilmagan xarajatlarga yo‘l qo‘ygani uchun so‘roq qilinishi kerak. 

Lopesning konserti yakshanba kuni respublika stadionida bo‘lib o‘tdi. OAVning yozishicha, konsertni tashkil etish uchun davlat budjetidan 6 million dollar ajratilgan. Keyinroq Yerevan vitse-meri Armen Pambukchyan hukumat 7 million dollar ajratganini, biroq xarajatlar o‘zini oqlaganini aytdi.