Rossiya prezidenti Vladimir Putin va Armaniston bosh vaziri Nikol Pashinyan Bishkekda Shanhay hamkorlik tashkiloti sammiti doirasida uchrashdi. Kreml 1-sentabr kuni eʼlon qilgan muzokaralar stenogrammasida Armanistonning Yevropa Ittifoqiga aʼzo boʻlish rejalari asosiy mavzulardan biri boʻlgani qayd etilgan.
Putinning fikricha, Armanistonning boshqa iqtisodiy tuzilmaga qoʻshilish jarayonini boshlashi YeOIIdan chiqishni anglatadi, chunki bir vaqtning oʻzida har ikki tuzilmaga aʼzo boʻlish mumkin emas.
«Siz chiqish haqida eʼlon qilmaganingizni aytdingiz. Boshqa iqtisodiy tashkilotga aʼzo boʻlish jarayonini boshlash toʻgʻrisidagi qonunning qabul qilinishi amalda bizning tashkilotdan chiqish haqidagi bayonotni anglatadi. Chunki u yerda ham, bu yerda ham bir vaqtning oʻzida boʻlish mumkin emas», dedi Putin.
Rossiya prezidenti Armanistonda YEI va YEOII masalasi boʻyicha referendum oʻtkazish taklifini yana bir bor ilgari surib, bu borada aholining fikrini soʻrash kerakligini aytdi.
Pashinyan esa Armaniston Rossiya bilan ikki tomonlama shartnomalarni hamda YEOII doirasidagi huquqiy bazani tahlil qilganini bildirdi.
Uning soʻzlariga koʻra, Yerevan Armanistonning Rossiya yoki YEOII oldidagi majburiyatlarini buzgan biror holatni aniqlamagan.
Pashinyan, shuningdek, 2025-yilda Yevropa integratsiyasiga oid qonun qabul qilinishi bilan Armaniston YEI va YEOII oʻrtasida tanlov qilish boʻyicha referendum oʻtkazish gʻoyasidan amalda voz kechganini aytdi.
Armaniston bosh vaziri 24-avgust kuni mamlakat yaqin vaqt ichida Yevropa Ittifoqiga aʼzo boʻlish uchun ariza berish jarayonini boshlash niyatida ekanini maʼlum qilgan edi.
Shundan soʻng Yevropa komissiyasi Armaniston hozir «Yevropa Ittifoqiga har qachongidan ham yaqinroq» ekanini bildirgan. Biroq Bryussel YeIga aʼzo boʻlish aniq belgilangan va nomzod mamlakatning natijalariga asoslangan jarayon ekanini ham eslatgan.
Putin esa avval ham Yevropa Ittifoqi va Yevrosiyo iqtisodiy ittifoqiga bir vaqtning oʻzida aʼzo boʻlish mumkin emasligini taʼkidlab kelgan.
Rossiya va Armaniston oʻrtasidagi munosabatlarda soʻnggi vaqtlarda kelishmovchiliklar kuzatilmoqda. DW maʼlumotiga koʻra, Armanistondagi parlament saylovlari arafasida Moskva ayrim arman mahsulotlarining Rossiyaga olib kirilishini taqiqlagan.
