Toshkentda o‘zini DXX xodimi sifatida tanishtirgan shaxs ushlandi

U o‘zini go‘yoki DXX xodimi deya tanishtirib, Namangan viloyatida ro‘yxatdan o‘tgan xususiy korxona nomiga olib kelingan tovarlarni Bojxona qo‘mitasining Shaxsiy xavfsizlik boshqarmasida ishlovchi tanishlari orqali hech qanday muammosiz bojxona nazorati va rasmiylashtiruvidan o‘tkazib berishini aytgan.

DXX va bojxona idoralari hamkorligida o‘tkazilgan tezkor tadbirda, ushbu fuqaro korxona rahbaridan firibgarlik yo‘li bilan har bir yuk partiyasi uchun 500 AQSh dollaridan jami 1000 AQSh dollari miqdoridagi pul mablag‘larini olgan vaqtida ushlandi.

Aniqlanishicha, mazkur shaxs korxonaga xorijdan import qilinayotgan avtomobil ehtiyot qismlarini bojxona rasmiylashtiruvidan tezlashtirib chiqarib berayotganini aytib, korxona rahbaridan muqaddam 1000 AQSh dollari olgan.

Hozirda unga nisbatan jinoyat ishi qo‘zg‘atilib, tergov harakatlari olib borilmoqda.