“Quruvchi tannarxidan emas, budjetga to‘laydigan solig‘idan chegirma qilib beryapti” – SSP raisi

Savdo-sanoat palatasi raisi Davron Vahobovga ko‘ra, bugungi kunda tadbirkorlarning o‘zlari raqobatning teng shartlarini va biznes yuritishning shaffof mexanizmlarini yaratish tashabbusi bilan chiqyapti.

«Ular xufiyona ishlaydigan tadbirkorlik sub’yektlari qonuniy ishlaydigan tadbirkorlarga teng raqobat qilmayotganini ta’kidlayapti. Shu sababli qonuniy ishlaydigan tadbirkorlik sub’yektlari tarafidan qonuniy ishlamaydigan tadbirkorlarga choralarni kuchaytirish takliflari berilyapti», – dedi u «O‘zbekiston 24» telekanaliga bergan intervyusida.

Vahobov qurilish sohasidan misol keltirib o‘tdi: «Betonli domlarimizning bir kvadrati 4 million 600 ming so‘m (yerning narxini qo‘shmaganda). G‘ishtli domlarimizning narxi 5,5−6 million so‘m. Tadbirkor ertaga qaysidir mijozga shu uyni sotadigan bo‘lsa, u davlatga to‘lanmagan soliq natijasida uyning narxini imtiyozli qilib beryapti, ya’ni chegirma o‘tib beryapti. Lekin u mahsulot tannarxidan emas, budjetga to‘laydigan solig‘idan chegirma qilib beryapti».

SSP raisi so‘zlariga ko‘ra, qishloq xo‘jaligi va transport sohasida ham xufiyona iqtisodiyot juda yuqori darajada kuzatilmoqda.

«Transport kompaniyasida 150 ta transport ulovi bo‘ladigan bo‘lsa, faqat 15 kishi rasmiylashtirilgan. Bunday kompaniyalar uchun prezident tomonidan rag‘batlantiruvchi mezonlarni ko‘paytirish, ularga arzon aylanma mablag‘ krediti yoki boshqa imtiyozlardan berib, ishchi o‘rinlarining shaffof ko‘rsatilishiga erishish bo‘yicha aniq yo‘nalishlar berildi», – deya ta’kidladi u.

Avvalroq, 2028 yilgacha respublika bo‘yicha bosqichma-bosqich ko‘chmas mulkning bozor qiymatini aniqlash tizimiga o‘tilishi xabar qilingandi. Shu asosda ko‘chmas mulk solig‘i stavkalari ham pasaytirib boriladi. Soliq qo‘mitasi raisi Sherzod Qudbiyev Toshkentda uy-joyning minimal qiymatini belgilash va kelgusida shu me’yorga rioya qilish bo‘yicha takliflar ishlab chiqishni taklif qilgandi. U poytaxtda uy-joyning 1 kv metr qiymati kamida 500 dollar ekanini ta’kidlab o‘tgandi.