Niderlandiyada Rossiya foydasiga josuslik ishi bo‘yicha o‘smirlar hibsga olindi

Niderlandiyada Rossiya foydasiga josuslik qilgan ikki nafar 17 yoshli yigit hibsga olindi. Bu haqda 26 sentabr, juma kuni De Telegraaf gazetasi xabar berdi. Otalaridan birining so‘zlariga ko‘ra, o‘smirlar 16 avgust kuni Haagadagi Yevropol, Yevropa adliya tizimi va Kanada elchixonasi binolari yonidan o‘tgan marshrut bo‘ylab «Wi-Fi-sniffer» — tarmoqlarni skanerlash va parollarni o‘g‘irlash, ma’lumotlarni ushlab qolish uchun ishlatilishi mumkin bo‘lgan qurilmani ko‘tarib o‘tgan.

Anonim kurator yigitlar bilan Telegram messenjeri orqali aloqa o‘rnatgan. Hibsga olishlar Niderlandiya Razvedka va xavfsizlik xizmati (AIVD) ma’lumotlari ortidan sodir bo‘ldi.

Bu Niderlandiyada voyaga yetmaganlarning xorijiy davlat tomonidan yollanishi bilan bog‘liq birinchi holat. 25 sentabr, payshanba kuni gumonlanuvchilar tergov sudyasi oldiga keltirildi, sudya ulardan biriga qo‘shimcha 14 kun hibsda qolishni buyurdi. Ikkinchisiga esa uy qamog‘ida qolish va elektron bilaguzuk taqish buyurilgan.

Nashrning yozishicha, o‘smirlardan biri maktab o‘quvchisi bo‘lib, hokkey o‘ynaydi, geymingni yaxshi ko‘radi va hali ham yumshoq o‘yinchoq bilan uxlaydi. U bazmlarga bormagan, supermarketda ishlagan.

Qo‘lga olish chog‘ida kamida sakkiz kishi tintuv o‘tkazish orderini ko‘targan holda uyga bostirib kirgan. Voqea ota-onalar uchun mutlaqo kutilmagan voqea bo‘ldi.