Ekologik toza hududlarning huquqiy maqomi belgilanmoqda

Ta’kidlanganidek, qonun loyihasi ekologik tizimlarni, tabiat obektlarini asrash, saqlab qolish va himoyasini kuchaytirish, turistik-rekreatsion, sog‘lomlashtirishga mo‘ljallangan tabiiy obekt va majmualar degradatsiyasining oldini olish maqsadida toza hudud rejimini joriy etishga qaratilgan.

Qonun loyihasida toza hudud rejimi amal qiladigan hududlarda ekologik tizimlar barqarorligining buzilishi va tabiiy landshaftlar ko‘rinishining o‘zgartirilishiga olib keladigan ishlarni amalga oshirishni taqiqlash belgilanmoqda.

Shuningdek, tabiiy organik polimer mahsulotlardan tashqari bir martalik plastik mahsulotlarning muomalada bo‘lishini cheklash hamda tuproqning unumdorligini oshirish maqsadida organik o‘g‘itlardan foydalanishni rag‘batlantirish ko‘zda tutilmoqda. Bundan tashqari, polietilen polimer plyonkali paketlarning atrof-muhitga ta’sirini kamaytirishga qaratilgan normalar belgilanmoqda.

Yig‘ilishda ta’kidlanishicha, qonun loyihasining qabul qilinishi ekologik barqarorlikni ta’minlash, chiqindilar miqdorini kamaytirish, aholi salomatligini muhofaza qilish hamda tabiatni asrashga xizmat qiladi.

Ekologik partiya fraksiyasi a’zosi Mohira Xo‘jayeva ekologik toza hududlar rejimini joriy etish nafaqat yashil hayot tarzini qaror toptirishga, balki chiqindilarni kamaytirish va qayta ishlash madaniyatini rivojlantirishga xizmat qilishini alohida qayd etdi.

Yakunda fraksiya a’zolari qonun loyihasini qabul qilish mamlakatda ekologik siyosatni izchil amalga oshirish va barqaror rivojlanish maqsadlariga erishishda muhim qadam bo‘lishini ta’kidlab, uni takomillashtirish bo‘yicha bir qator takliflarni ilgari surdilar. Qizg‘in muhokamalardan so‘ng, qonun loyihasi fraksiya a’zolari tomonidan ma’qullandi.