O‘zgidromet Qoraqalpog‘iston va Navoiyda kuchli shamol va chang-to‘zon ehtimoli haqida ogohlantirdi

O‘zgidromet ma’lumotiga ko‘ra, 27 oktyabr kuni Qoraqalpog‘iston Respublikasi va Navoiy viloyatining ayrim hududlarida shamol tezligi sekundiga 13–18 metrgacha kuchayishi, joy-joyida chang-to‘zonlar kuzatilishi mumkin. Aholi ehtiyot choralariga amal qilishga chaqirildi.

Foto: Kun.uz

O‘zbekiston Gidrometeorologiya xizmati markazi (O‘zgidromet) bugun kunduz payti uchun havo sharoiti haqida ogohlantirish e’lon qildi. Qayd etilishicha, Qoraqalpog‘iston Respublikasi va Navoiy viloyatining ba’zi tuman va shaharlarida shamol sekundiga 13–18 m/s gacha kuchayishi, ayrim joylarda ko‘rinuvchanlik pasayishiga olib keluvchi chang-to‘zonlar qayd etilishi mumkin.

O‘zgidromet aholi va mehmonlarga quyidagi tavsiyalarga amal qilishni so‘radi:

ochiq havodagi faoliyatni qisqartirish, zarurat bo‘lmasa uzoqqa chiqmaslik;
niqob yoki respirator, ko‘zoynak kabi himoya vositalaridan foydalanish;
uy va ish xonalarida eshik-darchalarni berkitish, konditsioner/chang filtrlarini tekshirish;
haydovchilar uchun tezlikni pasaytirish, masofani saqlash va tuman-chang sharoitida chiroqlardan to‘g‘ri foydalanish.

Ogohlantirishda qayd etilgan shamol va chang-to‘zon hodisalari ayrim hududlarda qisqa muddatli bo‘lishi mumkin. Tegishli xizmatlar vaziyatni monitoring qilmoqda.