Britaniya qiroli Charlz III ukasini shahzoda unvonidan mahrum qildi

Buyuk Britaniya qirolining ukasi shahzoda Endryu barcha unvonlaridan mahrum etiladi va Vindzor qasri hududidagi qirollik xonadonlarini tark etadi. Marhum malika Yelizaveta II ning ikkinchi o‘g‘lini unvonlardan mahrum etishning rasmiy tartibini qirol Charlz III boshlab bergani haqida 30 oktyabr kuni Bukinhem saroyi xabar berdi.

Bayonotda aytilishicha, shahzoda Endryuga Royal Lodj (Royal Lodge) rezidensiyasi bo‘yicha “ijara shartnomasini bekor qilish haqida rasmiy bildirishnoma yuborilgan” va u “boshqa xususiy uy-joyga ko‘chib o‘tadi”. BBC mediakorporatsiyasi aniqlashicha, Endryu Norfolk grafligidagi qirollikning Sandrinhem mulkiga ko‘chadi, yashash xarajatlarini esa qirol o‘z shaxsiy mablag‘laridan qoplab beradi.

Bukinhem saroyi Britaniya shahzodasining voyaga yetmaganlarga nisbatan jinsiy savdo ayblovlari qo‘yilgan amerikalik moliyachi Jyeffri Epshteyn bilan aloqalari atrofidagi mojaro fonida bu qarorni e’lon qildi. 2019 yili Epshteyn qamoqxona kamerasida o‘z joniga qasd qilgan holda topilgan edi.

“Ushbu choralar zarur, deb hisoblandi, garchi u (Endryu) o‘ziga nisbatan ilgari surilgan ayblovlarni rad etishda davom etsa-da, — deyiladi saroy bildiruvida. — Qirol fikri zo‘ravonlikning har qanday ko‘rinishiga duch kelgan jabrdiydalar va omon qolganlar bilan bo‘lgan va shunday bo‘lib qolishini aniq bayon qilishni istaydi”.

Qiroliy oila a’zosining Epshteyn bilan do‘stligi mavzusi yaqinda Virjiniya Juffrening vafotidan so‘ng nashr etilish arafasidagi xotiralaridan iqtiboslar e’lon qilingach yana diqqat markaziga qaytdi. U mazkur kitobda Epshteyn tomonidan odam savdosining qurboni bo‘lganini va 17 yoshida shahzoda Endryu bilan jinsiy aloqalarga kirishganini da’vo qiladi.

Bukinhem saroyi ma’lumotlariga ko‘ra, endilikda shahzoda Endryu “Endryu Mauntbetten-Vindzor” deb ataladi.

Joriy oktyabr oyida Endryu York hersogi unvonidan voz kechganini e’lon qilgan edi. 2022 yilda u unvonlarining katta qismidan mahrum etilgan va qirollik vazifalaridan chetlatilgan. Shahzoda unvonidan mahrum qilish uni Britaniya taxtiga da’vogarlar ro‘yxatidan avtomatik ravishda chiqarib tashlashni anglatmaydi — u meros tartibida sakkizinchi o‘rinda qolmoqda.