24-avgust kuni Kiyevda boʻlib oʻtgan «Koʻngillilar koalitsiyasi» uchrashuvidan keyin Buyuk Britaniya bosh vaziri Endi Byornem Ukraina va Britaniya sunʼiy intellektdan harbiy maqsadlarda foydalanish sohasida hamkorlik toʻgʻrisida kelishuv imzolaganini maʼlum qildi.
Kelishuv Britaniyaga Ukraina Rossiya hujumlarini qaytarish davomida toʻplagan materiallardan sunʼiy intellekt texnologiyalarini rivojlantirishda foydalanish imkonini beradi.
Britaniya bosh vazirining soʻzlariga koʻra, hamkorlik Ukrainaning «tengsiz jang tajribasi»ni Buyuk Britaniyaning «jahon darajasidagi sunʼiy intellekt ekotizimi» bilan birlashtiradi.
Ukrainadagi harbiy harakatlar paytida toʻplangan maʼlumotlar Britaniyada sinovdan oʻtkaziladi. Ulardan harbiy bazalar, aeroportlar, temiryoʻl tarmoqlari, elektr stansiyalari va qamoqxonalar kabi muhim obyektlarni uchuvchisiz uchish apparatlaridan himoya qilish tizimlarini takomillashtirishda foydalanish rejalashtirilgan.
Ukraina millionlab jang videolarini taqdim etadi
Hamkorlik doirasida Kiyev Londonga jang maydonidan olingan millionlab videoyazuvlarni taqdim etadi.
Avenger («Qasoskor») nomi bilan yuritiladigan ushbu maʼlumotlar toʻplami hozirning oʻzida Ukrainaning avtonom dronlarini boshqarishga moʻljallangan sunʼiy intellekt tizimlarini oʻqitishda ishlatilmoqda.
Britaniya tomoni ushbu maʼlumotlarni sunʼiy intellektni harbiy sharoitlarga moslashtirish uchun oʻta qimmatli manba sifatida baholagan.
Jang maydonida olingan videolar SI modellariga dronlar, harbiy texnika, harakatlanayotgan nishonlar va turli tahdidlarni real sharoitda aniqlashni oʻrgatish imkonini berishi mumkin.
London ham Ukrainaga texnologik yordamni oshiradi
Ukraina maʼlumotlar taqdim etishi evaziga Buyuk Britaniya Kiyevga texnologiyalar sohasida qoʻshimcha koʻmak koʻrsatadi.
Bunda Britaniya universitetlari, olimlari va texnologik kompaniyalarining imkoniyatlaridan foydalanish, shuningdek, mamlakatning sunʼiy intellekt ekotizimini Ukraina bilan hamkorlikka jalb qilish rejalashtirilgan.
Byornemning taʼkidlashicha, hamkorlik nafaqat milliy xavfsizlik imkoniyatlarini kuchaytiradi, balki muhim infratuzilmani yaxshiroq himoya qilish va iqtisodiy oʻsishga xizmat qiluvchi texnologiyalarni tezroq rivojlantirish imkonini beradi.
