Oʻzbekiston qishloq xoʻjaligi mahsulotlari eksporti geografiyasini kengaytirish doirasida mahalliy uzum va qovunlarning yangi navlari Buyuk Britaniya bozoriga yetkazib berildi. Bu haqda «Dunyo» axborot agentligi xabar berdi.
Oʻzbekistonning Londondagi elchixonasi koʻmagida Britaniyaning Capital Foodservice kompaniyasi oʻzbek meva-sabzavot mahsulotlarini import qilishni yoʻlga qoʻygan.
Xususan, Buyuk Britaniyaga Oʻzbekistonda yetishtirilgan «Kelin barmoq» navli uzum, shuningdek, «Torpeda», «Koʻkcha» va «Obi novvot» navli qovunlar yetkazib berilmoqda.
Eksport qilinayotgan mahsulotlarni Britaniyaga tezkor yetkazish uchun havo transportidan foydalanilmoqda. Qishloq xoʻjaligi mahsulotlari Uzbekistan Airways aviakompaniyasining muntazam reyslari orqali manzilga olib borilmoqda.
Meva-sabzavot mahsulotlarini Buyuk Britaniyaga yetkazib berish jarayoni mavsum yakuniga qadar muntazam davom ettirilishi rejalashtirilgan.
Qayd etilishicha, ushbu hamkorlik Oʻzbekiston qishloq xoʻjaligi mahsulotlarining Britaniya bozoridagi ishtirokini kengaytirish, mahalliy meva-sabzavotlarga boʻlgan talabni oshirish hamda oʻzbek mahsulotlarining xorijdagi nufuzini mustahkamlashga qaratilgan.
Shu tariqa, Buyuk Britaniyaga eksport qilinayotgan oʻzbek qishloq xoʻjaligi mahsulotlari assortimenti «Kelin barmoq» uzumi va qovunning bir nechta mahalliy navlari hisobiga kengaymoqda.
