Raqobat qo‘mitasi Golden House’ni ogohlantirdi

Golden House Property Group MChJga qonunbuzilish holatlarini ixtiyoriy bartaraf etish yuzasidan ko‘rsatma berildi, deya xabar berdi Raqobat qo‘mitasi.

Ijtimoiy tarmoq orqali «Tanqid uchun jarima undirilishi qonuniymi?» mazmunida qoldirilgan murojaat muhokamalariga sabab bo‘lgan. Jumladan, ushbu murojaatda «Agar iste’molchi o‘z tashabbusi bilan shartnomani bekor qilsa, qurilish tashkiloti to‘langan mablag‘ning yoki shartnoma qiymatining 10 foizi miqdoridagi summani jarima sifatida ushlab qolish huquqiga egaligi, shuningdek, mijozlar bu quruvchi korxona ustidan murojaat qilgan taqdirda uning ishchanligi va obro‘siga putur yetkazilgan deya yana unga jarima qo‘llanishi» ham bildirilgan.

«Qo‘mita tomonidan olib borilgan o‘rganishlarda Golden House kompaniyasi tomonidan ulush kiritish asosida ko‘p qavatli uydan xonadon xarid qilish shartnomasi shartlarida iste’molchi o‘z tashabbusi bilan shartnomani bekor qilgan taqdirda hamda ushbu kompaniya faoliyatiga nisbatan norozilik bildirib OAV, tegishli idora va tashkilotlarga murojaat qilinishiga ham shartnoma qiymatining 10 foizi miqdoridagi summaning jarima sifatida ushlab qolinishi iste’molchi huquqlarini cheklab qo‘yadigan shartlardan biri ekani ma’lum bo‘ldi», deyiladi qo‘mita xabarida.

Raqobat qo‘mitasi tomonidan «Iste’molchilar huquqlarini himoya qilish to‘g‘risida»gi qonunning 4, 6, 21 va 23-moddalari talablari asosida Golden House Property Group MChJga qonunbuzilishi holatlarini ixtiyoriy ravishda bartaraf etish choralarini ko‘rishi yuzasidan belgilangan tartibda ko‘rsatma berilgan.