Buxoro biyennalesida amerikalik rassom shirinliklardan pavilion qurdi

Buxorodagi ilk xalqaro biyennale - Recipes for Broken Hears doirasida Misrda tug‘ilgan, AQShda faoliyat yurituvchi rassom Leyla Goxar mahalliy novvot - toshqand shakar kristallaridan «kristall uy» ko‘rinishida pavilion barpo etdi. Installyatsiya mehmondo‘stlik va birlashuv ramzi sifatida taom va ta’m orqali xotirani uyg‘otish g‘oyasini aks ettiradi. Tadbir 2025 yil 5 sentabrdan 20 noyabrgacha o‘tkazilmoqda.

Biyennale axborotiga ko‘ra, Goxarning «Novvot uy» (2024–2025) nomi bilan taqdim etilgan ishi novvot kristallarining uzun tolalariga suyangan «kristall pavilion» bo‘lib, mehmon uchun shirinlik qo‘yish an’anasiga ishora qiladi. Loyiha mahalliy usta Ilhom Shoyimqulov va hamkor me’morlar bilan hamjihatlikda yaratilgan.

Asar Buxoroning tarixiy maskanlaridan birida joylashtirilgan bo‘lib, ayrim manbalarga ko‘ra Gavkushon madrasasi eshigi oldida «kirish darvozasi» kabi tajriba makonini hosil qiladi. Konstruksiyadagi shakar tolalari issiqda sekin erib, zamon o‘tishi va xotira «erishi» manzarasini yaratadi — tomoshabinga qisqa umrli, ammo ta’sirchan hissiy tajriba beradi.

Biyennale dasturida 70 dan ziyod sayt-spetsifik ish, mahorat darslari va kulinar performanslar jamlangan. Oziq-ovqat — an’ana — xotira o‘rtasidagi bog‘liqlik markaziy mavzulardan biri sifatida qayd etilgan.

Tayyorlagan: Отабек Матназаров

#Buxoro #Buxoro biyennalesi