Belgiya mudofaa vaziri: dronlar F-16 haqida razvedka ma’lumoti to‘playapti

Belgiya harbiy bazalari ustida uchayotgan dronlar qiruvchilar va o‘q-dorilarga oid ma’lumot to‘playapti. Bu haqda Belgiya mudofaa vaziri Teo Franken 2 noyabr kuni RTBF telekanaliga ma’lum qildi.

«Ular (dronlar) josuslik qilish uchun kelyapti — F-16'lar qayerda, o‘q-dorilar qayerda joylashgani va boshqa strategik muhim ma’lumotlarni qayd etish uchun», — dedi Franken.

Belgiya mamlakat shimoliy-sharqidagi Per shahrida joylashgan NATOning Klyayne-Brogel havo bazasi uzra uchuvchisiz apparatlar ko‘rilgani haqida xabarlar kelib tushgach, tekshiruv boshladi. U yerda AQShda ishlab chiqilgan, yadroviy qurol tashishi mumkin bo‘lgan Belgiyaning F-16 qiruvchilari bor, shuningdek bu yerda F-35 samolyotlari ham joylashtiriladi, deb yozdi Politico nashri.

Ushbu aviabaza oktyabr oyida alyans hududini yadroviy qurol bilan mudofaa qilish bo‘yicha NATOning yillik mashqlari uchun foydalanilgan. Manyovrlarda taxminan 2 ming harbiy ishtirok etgan.

«Ruslar bunga (havo hududiga kirib borish) barcha Yevropa mamlakatlarida urinib ko‘ryapti», — degan edi o‘sha payt Franken. Uning so‘zlaricha, Moskva Klyayne-Brogel atrofidagi hodisaga bevosita aloqadormi-yo‘qmi — «aytish qiyin». «Ammo motivlar aniq, va bunday harakatlarni amalga oshirish usullari ham mutlaqo ravshan», — deya qo‘shimcha qildi u.

Kutilishicha, kelasi hafta Belgiya mudofaa vaziri qiymati 50 mln yevro bo‘lgan milliy dronlarga qarshi chora-tadbirlar tizimini joriy etish rejasini taqdim etadi. U avvalroq Radio 1'ga bergan intervyusida paket doirasida dronlarni aniqlash, ularni ishdan chiqarish tizimlari moliyalashtirilishini aytgan.

NATOning shimoliy-sharqiy Belgiyadagi aviabazasi ustida ilgari ikki marta noma’lum dronlar ko‘rilgan. Dronlar paydo bo‘lgani 2 noyabrga o‘tar kechasi, shuningdek, undan oldingi kechada aniqlash tizimi tomonidan qayd etilgan.

Shu bilan birga, dronlar bilan kurashuvchi tizim dronlarga samarali qarshi tura olmaganiga, ehtimol, obektlargacha masofa kattaligi yoki radiosignal chastotalari noto‘g‘ri tanlangani sabab bo‘lishi mumkinligini Franken qayd etdi. Dronni politsiya vertolyotlari ta’qib qilgan, ammo bir necha kilometrdan keyin aloqa uzilgan. Tekshiruv davom etmoqda, dedi vazir.

So‘nggi haftalarda Belgiyada bunga o‘xshash hodisalar bir necha marotaba qayd etildi. Oktyabr oyi oxirida Marsh-an-Famen (Lej janubi) harbiy bazasi ustida ikki marta dronlar ko‘rilgan. Mudofaa vaziri «Belgiya armiyasining yuragiga qarshi atayin rejalashtirilgan operatsiya» haqida gapirib, tajribali dron pilotlari ish olib borganini aytdi. Oktyabr boshida esa mamlakat sharqidagi Elzenborn harbiy poligoni ustida 15 ta dron kuzatilgan.

Noma’lum dronlar oxirgi vaqtlarda Germaniya, Daniya va Norvegiya kabi qator Yevropa davlatlaridagi harbiy obektlar va aeroportlar atrofida ham ko‘p bora ko‘rilgan. Bu hodisalar munosabati bilan ayrim aeroportlar vaqtincha reyslarni qabul qilish va jo‘natishni to‘xtatgan.