Jinoyat ishlari bo‘yicha Xonobod shahar sudi sobiq raisi uzoq muddatga qamaldi

JIB Xonobod shahar sudi sobiq raisi Yunusjon Egamberdiyev jinoiy jazoga tortildi. Bu haqda Oliy sud matbuot kotibi Aziz Abidov xabar berdi.

Ma’lum qilinishicha, Yunusjon Egamberdiyevga nisbatan qo‘zg‘atilgan jinoyat ishi Oliy sudning jinoyat ishlari bo‘yicha sudlov hay’ati tomonidan ko‘rib chiqilib, 17 oktyabrda hukm o‘qilgan. 51 yoshli sobiq sudya Jinoyat kodeksning 25,168-moddasi 4-qismi “a” bandi va 25,211-moddasi 3-qismi “a” bandida nazarda tutilgan jinoyatlarni sodir etganlikda aybdor deb topilgan. Unga 2,5 yil davomida mansab lavozimlarida, sud va huquqni muhofaza qiluvchi organlarida ishlash huquqidan mahrum qilgan holda 10,5 yil muddatga ozodlikdan mahrum qilish jazosi tayinlangan.

Birinchi instansiya sudining hukmi ustidan taraflar qonunda belgilangan tartib va muddatda Oliy sudning jinoyat ishlari bo‘yicha sudlov hay’atiga apellyatsiya/kassatsiya tartibida shikoyat berish va protest keltirishga haqliligi ma’lum qilingan.

Oliy sudning Adolat axborot tizimlari kompleksida Yunusjon Egamberdiyevga oid jinoyat ishi bo‘yicha 2025 yil 17 oktyabrda e’lon qilingan sud hukmi yashirib qo‘yildi. Ushbu sud hukmi o‘rniga jinoyat ishlari bo‘yicha Toshkent viloyati sudi kassatsiya instansiyasi sudlov hay’atining 2019 yil 28 maydagi ajrimi yuklab qo‘yilgan.

Yunusjon Egamberdiyev 2025 yil may oyida muqaddam boshqa sud tomonidan tayinlangan ozodlikdan mahrum qilish jazo muddatini kamaytirishni va’da qilib, sudlangan shaxsning onasidan 30 ming dollar miqdordagi pullarni olgan vaqtda huquqni muhofaza qiluvchi organlar xodimlari tomonidan o‘tkazilgan tadbirda ushlangandi. Oliy sud Plenumining majlisida bosh prokurorning Egamberdiyevni jinoiy javobgarlikka tortish va unga nisbatan “qamoqqa olish” tarzidagi ehtiyot chorasini qo‘llash haqidagi taqdimnomasi ko‘rib chiqilib, rozilik berilgan.

Ma’lumot uchun, Yunusjon Egamberdiyev 2013-2018 yillarda JIB Asaka tuman sudi sudyasi bo‘lib ishlagan. U sudyalik lavozimida keyingi muddatga o‘ta olmagan va ma’lum vaqt tadbirkorlik bilan shug‘ullangan. So‘ngra biroz advokat bo‘lib ishlagan Egamberdiyev 2024 yil dekabr oyida 5 yil muddatga Xonobod shahar sudining raisi lavozimiga tayinlangan.