Yerevanda chechen qizning o‘ldirilishi: jinoyat ishi qo‘zg‘atildi

Armaniston Tergov qo‘mitasi Yerevanda oktyabr oyida jasadi topilgan 23 yoshli chechen qiz Ayshat Baymuradovani o‘ldirishga ehtimoliy aloqadorlik bo‘yicha ikki kishiga nisbatan jinoyat ishini qo‘zg‘atganini 11 noyabr kuni «SK SOS» huquqni himoya qilish loyihasi qo‘mita javobiga tayanilgan holda xabar qildi.

Aniqlanishicha, ish og‘irlashtiruvchi holatlar bilan qasddan odam o‘ldirish moddasi bo‘yicha ochilgan. Tergovchilar guvohlardan ko‘rsatma olgani va kvartirada tintuv o‘tkazganini bildirgan. Shuningdek, qurbon jasadi bo‘yicha sud-tibbiy ekspertiza, voqea joyida topilgan barmoq izlari bo‘yicha sud-genetik ekspertiza tayinlangan.

Ismlar oshkor etilmagan bu ish bo‘yicha ikki figurant qidiruvga berilgan.

Joriy yil yanvaridan Armanistonda yashab kelgan Baymuradovaning yo‘qolgani haqida 17 oktyabr kuni ijara uyidagi qo‘shnilari xabar bergan. Ularning aytishicha, 15 oktyabr kuni Ayshat Instagram orqali tanish bo‘lgan bir ayol bilan uchrashuvga ketgan va uyga qaytmagan. Yerevanda yo‘qolgan qiz surati aks etgan, u Chechenistondan uy zo‘ravonligidan qochib kelgani haqida yozilgan varaqachalar ilingan. 20 oktyabr kuni Armaniston politsiyasi Baymuradova jasadi ijara uyidan topilganini ma’lum qildi. «Kavkaz bez materey» loyihasi asoschisi Lidiya Mixalchenko jurnalistlarga qizni bo‘g‘ib o‘ldirishganini aytdi. Uning so‘zlariga ko‘ra, gumonlanuvchi erkak va ayol, ehtimol, Rossiyaga ketib qolgan.

Armanistonlik huquq himoyachisi, Helsinki fuqarolik assambleyasi Vanadzor ofis rahbari Artur Sakuns DW'ga ma’lum qilishicha, Baymuradovani chaqirib, unga nisbatan jinoyat sodir etishga yordamlashgani taxmin qilinayotgan ayolning ismi Karina Iminova. Huquq himoyachilari 31 yoshli mana shu ismga ega ayolga nisbatan Rossiyada 2021 yilda «pichoq ishlatib o‘ldirish bilan qo‘rqitish» moddasi bo‘yicha jinoyat ishi qo‘zg‘atilganini aniqlagan.

Telegram’dagi «Ostorojno, novosti!» kanali yozishicha, Baymuradova o‘ldirilgan deb taxmin qilinayotgan kuni jasad topilgan kvartiradan ikki kishi chiqqan — buni kamera kuzatuvi qayd etgan. Bu Iminova va Chechenistonda tug‘ilgan 30 yoshli Said-Xamzat Baysarov ekani aytilmoqda. Kanal ma’lumotiga ko‘ra, 2018 yilda Baysarov Rossiyada taqiqlangan IShID tashkilotini moliyalashtirish ishida tilga olingan, ammo Moskva sudi unga qo‘yilgan ayblovlarni keyinroq bekor qilgan. Shuningdek, unga nisbatan mast holda mashina haydash va talonchilik moddalari bo‘yicha ham ishlar ochilgani yoziladi. Kanal Iminova va Baysarov Armanistonni «osongina tark etib», RFga qaytib ketganini ham bildirdi.