Toshkent va Nyu-York o‘rtasida sheriklik bitimi loyihasi tayyorlanadi

Toshkent shahar hokimiyatida poytaxt hokimi Shavkat Umrzoqov Nyu-York shahar meri Erik Adams boshchiligidagi delegatsiya bilan uchrashuv o‘tkazdi.

Suhbat davomida tomonlar yirik shaharlarni rivojlantirishning dolzarb masalalarini muhokama qilib, shahar infratuzilmasini modernizatsiya qilish, jamoat infratuzilmasi, transport va kommunal xizmatlar sohasidagi tajribalari bilan o‘rtoqlashdi. Shuningdek, Toshkent va Nyu-York o‘rtasidagi hamkorlikning istiqbolli yo‘nalishlari ko‘rib chiqildi.

Toshkent shahar hokimi mehmonlarni “Toshkentni 2030 yilgacha rivojlantirish strategiyasi”ning asosiy yo‘nalishlari bilan tanishtirdi. “Yangi Toshkent” loyihasi, “Yangi avlod” sanoat zonasini barpo etish, yangi jamoat maskanlari va shahar muhitini yaxshilashga qaratilgan yirik investitsiya loyihalari taqdim etildi.

Uchrashuvda Toshkentda transport tizimi, logistika va kommunal xo‘jalik sohasida amalga oshirilayotgan islohotlar to‘g‘risida ma’lumot berildi. Shuningdek, Marriott, Wendy’s, Pepsi (AQSh), DP World (BAA), VEOLIA (Fransiya) va boshqa xalqaro kompaniyalar bilan hamkorlikda amalga oshirilayotgan loyihalar haqida so‘z yuritildi.

Nyu-York shahar meri Erik Adams O‘zbekistondagi islohotlar sur’atini yuqori baholab, prezident Shavkat Mirziyoyev rahbarligida amalga oshirilayotgan o‘zgarishlar ko‘lami unda katta taassurot qoldirganini ta’kidladi. U Toshkentning rivojlanish yo‘nalishi to‘g‘ri tanlanganini, bu esa xalqaro aloqalarni mustahkamlash uchun yangi imkoniyatlar yaratayotganini qayd etdi.

Erik Adams Toshkent va Nyu-York o‘rtasidagi hamkorlikni yanada chuqurlashtirishga tayyorligini bildirib, ushbu tashrif Toshkentda amalga oshirilayotgan islohotlar va loyihalar bilan yaqindan tanishish imkonini berganini ta’kidladi.

Uchrashuv yakunida tomonlar shaharlarni kompleks rivojlantirish, madaniyat, innovatsiya va iqtisodiyot sohalarida uzoq muddatli hamkorlik uchun asos bo‘ladigan Toshkent va Nyu-York o‘rtasida sheriklik bitimi loyihasini tayyorlashga kirishish to‘g‘risida kelishib oldi.