Polsha investorlari O‘zbekiston qishloq xo‘jaligi sektoriga kirib kelmoqda

“Dunyo” AA muxbiri xabar berishicha, noyabr oyi so‘nggi haftasida o‘tkaziladigan birinchi O‘zbekiston–Polsha ishchi guruhi yig‘ilishida ishtirok etish uchun Polshaning biznes doiralaridan iborat delegatsiyasi mamlakatga tashrif buyuradi.

Ushbu tashrifning tashkiliy va mazmun jihatlarini muhokama qilish maqsadida O‘zbekistonning Polshadagi elchixonasi diplomatlari Polsha Qishloq xo‘jaligi va qishloqlarni rivojlantirish vazirligi kotibi Yatsek Chernyak bilan uchrashuv o‘tkazdi.

Uchrashuvda Yatsek Chernyak Polsha uchun O‘zbekistonni Markaziy Osiyodagi muhim va istiqbolli hamkor sifatida ko‘rishayotganini ta’kidladi. U mamlakat qishloq xo‘jaligi sohasida amalga oshirilayotgan keng ko‘lamli islohotlarni yuksak baholar ekan, mazkur tashrif ikki tomonlama hamkorlikni yangi bosqichga ko‘tarishiga umid bildirdi.

Tashrif doirasida Polsha Qishloq xo‘jaligi va qishloqlarni rivojlantirish vaziri Stefan Krayevskiy boshchiligidagi biznes delegatsiyasi ishtirokida G2B va B2B formatda uchrashuvlar tashkil etilishi ko‘zda tutilgan.

O‘zbekistonning Varshavadagi elchixonasi ishlab chiqqan dasturga ko‘ra, Stefan Krayevskiy va O‘zbekiston qishloq xo‘jaligi vaziri Ibrohim Abdurahmonov o‘rtasida uchrashuv o‘tkazilishi belgilangan. Mazkur muloqotda qishloq xo‘jaligi sohasida amalga oshirilayotgan ishlar, shu jumladan, investitsiyaviy loyihalar, agrotexnika va agrosanoat kooperatsiyasi yo‘nalishlaridagi hamkorlik masalalari muhokama etiladi.

Delegatsiya a’zolari shu yil 26–28 noyabr kunlari Toshkentda bo‘lib o‘tadigan Agro Expo Uzbekistan xalqaro ko‘rgazmasida Polsha milliy paviloni ochilishida ham ishtirok etadi. Ushbu ko‘rgazmada Polshaning 19 ta yetakchi kompaniyasi qishloq xo‘jaligi texnikasi, qayta ishlash uskunalari, urug‘chilik va ozuqa bazasiga oid yechimlarini taqdim etishi rejalashtirilgan.

Shuningdek, Polsha vakillari belgilangan dastur doirasida dehqonchilik, chorvachilik, go‘sht va sut mahsulotlarini qayta ishlash, qand lavlagi va shakar ishlab chiqarish yo‘nalishlari bo‘yicha yetakchi korxonalar mutaxassislari bilan uchrashuvlar o‘tkazadi. Mazkur muloqotlar orqali Polsha investorlarining O‘zbekiston qishloq xo‘jaligi sektoriga kirib kelishi, qo‘shma korxonalar tashkil etish va uzoq muddatli sheriklik loyihalarini amalga oshirish uchun yangi imkoniyatlar ochiladi.